ممبر پارلیمنٹ بدھوڑی نے سنگم وہار علاقے میں ڈسپنسری کا سنگ بنیاد رکھا

نئی دہلی،12جولائی (میرا وطن نیوز )
جنوبی دہلی کے رکن پارلیمنٹ رام ویر سنگھ بدھوڑی نے اتوار کو ایم ایل اے چندن کمار چودھری کے سا تھ سنگم وہار ‘اے’ وارڈ میں ایک ڈسپنسری کا سنگ بنیاد رکھا۔ ڈسپنسری پر تقریباً 1.20 کروڑ روپے کی لاگت کا تخمینہ ہے۔انہوں نے کہا کہ ان کے پارلیمانی حلقے میں عوام کے ترقیاتی کام جاری ہیں اور آئندہ بھی یہ سلسلہ جاری رہے گا ۔
اس موقع پربدھوڑی نے کہا کہ سنگم وہار ‘اے’ وارڈ میں پہلے کوئی ڈسپنسری نہیں تھی، اور اس سہولت کے کھلنے سے مقامی باشندوں کی ایک بڑی ضرورت پوری ہو جائے گی۔ انہوں نے کہا کہ ڈسپنسری علا قے کے لوگوں کو صحت کی بہترین سہولیات فراہم کرے گی۔انہوں نے کہا کہ وزیر اعلیٰ ریکھا گپتا نے دہلی کے ہر اسمبلی حلقے میں ترقی کے لیے ضروری فنڈز دستیاب کرائے ہیں۔ نتیجتاً اب شہر بھر میں ترقیاتی کام تیزی سے جاری ہیں۔