دہلی کے تمام 13 اضلاع میں ریپڈ ریسپانس ٹیمیں تشکیل دی گئیں

خون کو نالیوں یا پبلک سیوریج سسٹم میں بہنے کی اجازت نہیں ہونی چاہیے: کپل مشرا

نئی دہلی: 26 مئی (میرا وطن نیوز )
وزیر ترقیات کپل مشرا کی ہدایت پر عمل کرتے ہوئے جانوروں کی پرورش یونٹ کی ریپڈ رسپانس ٹیموں (آر آر ٹی) نے منگل کو دہلی کے شمال مغرب، شمال مشرق، وسطی شمالی، وسطی، جنوب مغربی اور مغربی اضلاع کے مختلف علاقوں اور بازاروں کا معائنہ کیا۔ ان معائنہ کے دوران انہوں نے بقرعید کے دورا ن کی جانے والی قربانیوں کے حوالے سے جاری کردہ ایڈوائزری کے حوالے سے عوام میں شعور اجاگر کیا اور عوام کو یہ بھی بتایا کہ کسی بھی خلاف ورزی پر سخت کارروائی عمل میں لائی جائے گی۔
تمام آر آر ٹی نے شہریوں، مویشیوں کے مالکان، جانوروں کے تاجروں اور ٹرانسپورٹروں سے اپیل کی ہے کہ وہ جانوروں کی نقل و حمل، خرید و فروخت، انتظام اور دیکھ بھال سے متعلق دہلی سرکارکی طرف سے جاری کردہ تمام ہدایات اور رہنما خطوط پر سختی سے عمل کریں۔
کابینی وزیر کپل مشرا نے بتایا کہ دہلی کے تمام 13 اضلاع میں ضلع انچارجز/ڈپٹی ڈائرکٹرس کی قیادت میں تشکیل دی گئی ریپڈ ریسپانس ٹیموں کو ہدایت دی گئی ہے کہ وہ فیلڈ سرگرمیوں کی نگرانی کریں، جانورو ں کی نقل و حمل اور انتظام کا معائنہ کریں، جانوروں کی فلاح و بہبود کے معیارات کی تعمیل کو یقینی بنائیں، اور کسی بھی رہنما خطوط کی خلاف ورزی کی صورت میں فوری ضروری کارروائی کریں۔
کپل مشرا نے مزید زور دیا کہ دہلی سرکارکی طرف سے جاری کردہ ایڈوائزری میں واضح ہدایات ہیں کہ تہوار کے دوران کسی بھی قسم کی غیر قانونی قربانی کی اجازت نہیں دی جائے گی۔ مزید برآں، عوامی مقامات پر جانوروں کی خرید و فروخت پر مکمل پابندی ہے۔ قربانی کا ذبح صرف مخصوص جگہوں پر کیا جا سکتا ہے۔ اسے سڑکوں، گلیوں یا دیگر عوامی مقامات پر نہیں کیا جانا چاہیے۔ مزید برآں، اس بات کا خا ص خیال رکھا جائے کہ گائے، بچھڑے اور اونٹ کو ذبح کرنا سختی سے ممنوع ہے۔
جانوروں کی نقل و حمل کے دوران ان پر کسی قسم کا ظلم نہیں کیا جائے گا۔ بغیر لائسنس کے احاطے میں گو شت کی فروخت سختی سے ممنوع ہے۔ خون کو نالیوں یا پبلک سیوریج سسٹم میں بہنے کی اجازت نہیں ہونی چاہیے۔ کسی بھی شکایت یا معلومات کے لیے شہری اپنے قریبی پولیس اسٹیشن یا پی سی آر سے رابطہ کر سکتے ہیں۔وزیر ترقیات کپل مشرا نے دہلی کے باشندوں سے اپیل کی ہے کہ وہ تہوار کے دوران فیلڈ ٹیموں کے ساتھ اپنا مکمل تعاون کریں اور سرکار کی طرف سے جاری کردہ تمام ایڈوائزری اور ہدایات کی سختی سے تعمیل کو یقینی بنائیں