سی بی ایس ای کے نصاب میں میتھلی زبان کی شمولیت تاریخی قدم ہے : سرویش کشیپ

نئی دہلی، 25 مئی(میرا وطن نیوز )
متھیلا کے لوگوں اور میتھلی زبان کے مداحوں کے لیے یہ انتہائی خوشی اور فخر کی بات ہے کہ سنٹرل بورڈ آف سیکنڈری ایجوکیشن (سی بی ایس ای) کے نصاب میں میتھلی کو شامل کرنے کے لیے ایک مثبت پہل کی گئی ہے۔ اس فیصلے سے نہ صرف میتھلی زبان اور ثقافت کو ایک نئی شناخت ملے گی بلکہ نئی نسل کو ان کی مادری زبان سے جوڑنے میں بھی مدد ملے گی۔
اس فیصلے کا خیرمقدم کرتے ہوئے جے ڈی (یو) دہلی ریاستی یونٹ کے جنرل سکریٹری سرویش کشیپ نے مرکزی وزیر مملکت برائے تعلیم جینت چودھری کا شکریہ ادا کیا۔ انہوں نے اسے متھیلا کے رہائشیو ں کے لیے ’ایک شاندار اور تاریخی لمحہ‘قرار دیا۔ برسوں سے، تعلیمی مرکزی دھارے میں میتھلی زبان کے لیے ایک جائز مقام حاصل کرنے کے لیے مسلسل مطالبات کیے جا رہے تھے- ایک مطالبہ جسے اب سنجیدگی سے تسلیم کر لیا گیا ہے۔
سرویش کشیپ نے کہا کہ وزارت تعلیم کی طرف سے اٹھایا گیا مثبت اقدام انتہائی قابل ستائش ہے۔ قو می تعلیمی پالیسی (NEP) 2020 کے ساتھ ہم آہنگی میں، اپنی مادری زبان میں تعلیم کو فروغ دینے کی طرف یہ قدم ہندوستانی زبانوں کے تحفظ اور افزودگی کی سمت میں ایک سنگ میل ثابت ہوگا۔
انہوں نے کہا کہ میتھلی محض ایک زبان نہیں ہے۔ یہ متھیلا کے ثقافتی ورثے، لوک روایات، اور جذباتی شناخت کی بنیاد کے طور پر کام کرتا ہے۔ سی بی ایس ای کے نصاب میں اس کی شمولیت سے ملک بھر کے لاکھوں طلباءکو اپنی زبان کے ذریعے سیکھنے اور ترقی کرنے کا موقع ملے گا۔ جے ڈی (یو) دہلی اسٹیٹ یونٹ نے امید ظاہر کی ہے کہ آنے والے وقتوں میں میتھلی زبان کو تعلیم، انتظامیہ اور ٹیکنالوجی کے شعبوں میں بھی بڑے پیمانے پر فروغ دیا جائے گا۔