راشن کارڈ کی اہلیت کےلئے خاندانی آمدنی کی حد میں اضافے کا اعلان

تقریباً 8لاکھ مستفیدین کو فائدہ ہوگا؛ زیر التوا معاملوںمیں آئے گی تیزی

نئی دہلی، 21 مئی (میرا وطن نیوز )
وزیر اعلیٰ ریکھا گپتا نے راشن کارڈ کی اہلیت کے لیے خاندانی آمدنی کی حد 1.20 لاکھ روپے سے بڑ ھا کر 2.5 لاکھ روپے سالانہ کرنے کا اعلان کیا ہے۔انہوں نے جمعرات کو دہلی سکریٹریٹ میں منعقد پریس کانفرنس میں کہا کہ صرف اہل لوگوں کو ہی راشن ملنا چاہیے۔ دہلی سرکاراس مقصد کے لیے مسلسل کام کر رہی ہے۔ انہوں نے کہا کہ 771,384 نااہل لوگوں کے راشن کارڈ منسوخ کر دیے گئے ہیں ۔ اس میں 144,000 ایسے افراد شامل ہیں جن کی آمدنی حد سے تجاوز کرگئی ہے، 35,800 افراد نے ایک سال سے راشن نہیں لیا، 29,580 اموات اور 23,394 ڈپلیکیٹ شامل ہیں۔
انہوں نے کہا کہ نئے راشن کارڈ کے لئے آن لائن درخواستیں 15 مئی سے شروع ہو گئی ہیں۔ درخوا ست کا عمل مکمل طور پر ڈیجیٹل اور بائیو میٹرک پر مبنی ہوگا۔ آدھار کارڈ، رہائش کا سرٹیفکیٹ، فیملی انکم سر ٹیفکیٹ اور فیملی ممبر کی تفصیلات درکار ہوں گی۔ انہوں نے کہا کہ راشن کی تقسیم بھی بائیو میٹرک طریقے سے کی جائے گی تاکہ شفافیت کو برقرار رکھا جا سکے اور اس بات کو یقینی بنایا جا سکے کہ صحیح راشن صحیح شخص تک پہنچے۔
وزیر اعلیٰ نے کہا کہ گزشتہ 13 سالوں سے دہلی کے لاکھوں غریبوں کو نئے راشن کارڈ حاصل کرنے کے موقع سے محروم رکھا گیا ہے۔ وہ سرکاری دفاتر کے چکر لگا رہے ہیں اور افسروں اور سیاست دانوں سے منتیں کر رہے ہیں، پھر بھی ان کے راشن کارڈ جاری نہیں ہوئے۔ انہوں نے کہا کہ ہم نے اقتدار میں آنے کے بعد جو پہلا قدم اٹھایا وہ یہ تھا کہ راشن سسٹم کا جامع آڈٹ کرایا جائے۔ آڈٹ کے بعد 771,384 نااہل مستحقین کے نام راشن لسٹ سے نکالے گئے ہیں۔اس موقع پر وزیر خوراک و رسد منجندر سنگھ سرما اور دیگر موجود تھے۔