دہلی این سی آر سمیت کئی ریاستوں میں بارش کا الرٹ

نئی دہلی: ملک کی کئی ریاستوں میں ایک بار پھر ابارش کا سلسلہ شروع ہو گیاہے۔ ہندوستان کے محکمہ موسمیات نے دہلی این سی آر، مغربی مدھیہ پردیش، اتراکھنڈ، مہاراشٹر سمیت کئی ریاستوں میں بارش کا الرٹ جاری کیا ہے۔ محکمہ موسمیات نے جنوب مغربی مدھیہ پردیش کے لیے ریڈ الرٹ جاری کیا ہے۔ اگلے تین دنوں میں یہاں انتہائی تیز بارش کی پیش گوئی کی گئی ہے۔
محکمہ موسمیات نے گجرات کے خطہ میں 16 سے 17 ستمبر تک موسلادھار بارش کی پیش گوئی کی ہے۔ اتراکھنڈ، سوراشٹرا، کچ، مراٹھواڑہ، کونکن اور گوا کے لیے بھی اورنج الرٹ جاری کیا گیا ہے۔ آئی ایم ڈی نے ایک سوشل میڈیا پوسٹ میں لکھا ہے، ‘مغربی مدھیہ پردیش ریڈ الرٹ پر ہے کیونکہ 17 ستمبر تک انتہائی بھاری بارش (204.4 ملی میٹر سے زیادہ) سمیت الگ تھلگ مقامات پر بھاری سے بہت بھاری بارش متوقع ہے۔
جمعہ کو دہلی اور آس پاس کے علاقوں میں تیز ہواؤں کے ساتھ تیز بارش ہوئی۔ آئی ایم ڈی کے مطابق جمعہ کی علی الصبح 8:30 بجے تک 4.1 ملی میٹر بارش ریکارڈ کی گئی۔ دہلی این سی آر میں اگلے پانچ دنوں تک بادل چھائے رہنے کی امید ہے۔ بعض مقامات پر بوندا باندی کا بھی امکان ہے۔ اس دوران یہاں کے لوگوں کو گرمی سے کچھ راحت مل سکتی ہے۔
محکمہ موسمیات کے مطابق آج مغربی مدھیہ پردیش، شمالی وسطی مہاراشٹر اور گجرات کے علاقوں میں الگ تھلگ مقامات پر موسلادھار سے بہت زیادہ بارش کا امکان ہے۔ مشرقی راجستھان، مشرقی مدھیہ پردیش، ودربھ، کونکن اور گوا میں الگ تھلگ مقامات پر موسلادھار سے بہت بھاری بارش اور اتراکھنڈ، مغربی اتر پردیش، انڈمان اور نکوبار جزائر، مراٹھواڑہ، ساحلی کرناٹک میں الگ تھلگ مقامات پر بھاری بارش کا اظہار کیا گیا ہے۔