رنگ پوری پہاڑی کے 20ہزار رہائشیوں کو پینے کے پانی فراہم کرنا سرکار کی ذمہ داری ہے

نئی دہلی ،19اپریل (میرا وطن نیوز )
پردیش کانگریس صدر دیویندر یادو نے پانی کے شدید بحران کا جائزہ لینے کے لیے رنگپوری پہاڑی علا قے کا دورہ کیا۔ یہ بحران علاقے کے اندر واقع زیر زمین پانی کے چھ بورویلوں کو سیل کرنے کی وجہ سے پیدا ہوا ہے۔اپنے دورے کے دوران انہوں نے سینکڑوں مقامی باشندوں سے بات چیت کی اور ان کی شکایات کو غور سے سنا۔ یہ واضح طور پر سامنے آیا کہ بعض افراد نے عدالت کے سامنے حقائق کو توڑ مروڑ کر پیش کیا تھا، جس کی بنیاد پر بورویلوں کو سیل کرنے کا حکم دیا گیا تھا۔ عدالت کو علاقے میں موجود اصل زمینی حقیقت سے آگاہ نہیں کیا گیا۔
یہ حکم ایک ایسے وقت نافذ ہوا ہے جب دہلی بھر میں گرمی کی شدید گرمی شروع ہو چکی ہے اور پانی کی ما نگ میں نمایاں اضافہ ہوا ہے۔ اس فیصلے کے نتیجے میں تقریباً 20ہزارافراد پانی کی بنیادی سہولتوں سے محروم ہو گئے ہیں جو کہ ان کے بنیادی حق زندگی کی براہ راست خلاف ورزی ہے۔ دیویندر یادو نے نشاندہی کی کہ عدالت کے حکم کے مطابق بورویل سیل کیے جانے کی صورت میں متاثرہ علاقے کے لیے پانی کے 20 ٹینکروں کا انتظام کیا جانا تھا۔ تاہم زمینی حقیقت یہ ہے کہ علاقے میں اس وقت صرف 2 سے 3 ٹینکرز فراہم کیے جا رہے ہیں جس سے پانی کی شدید قلت ہے اور مکینوں کو شدید مشکلا ت کا سامنا ہے۔
اس موقع پر سابق ایم ایل اے کرنل دیویندر سہراوت ،سابق ڈپٹی میئرپروین رانا ،تسویر سولنکی، ڈاکٹر پی کے مشرا؛ ورندر شرما، پریم پردھان، منوج بھاردواج؛ ایڈوکیٹ کنال سہراوت اور جوگندر سہراوت کے علاوہ، رنگپوری پہاڑی ویلفیئر کمیٹی کے اراکین بھی میٹنگ میں موجود تھے، جن میں ناگیندر اپادھیائے (آر ڈبلیو اے صدر)، فہمینہ، زرینہ، رام لال، راج، اور مولانا ثاقب شامل تہیں۔