اتم نگر میں وجے سیلز کے شوروم میں آتشزدگی، کروڑوں کا سامان جل کر خاکستر

نئی دہلی ،یکم جولائی (میرا وطن)
مغربی دہلی کے اتم نگر علاقے میں بدھ کو علی الصبح وجے سیلز کے چار منزلہ الیکٹرانک شوروم میں زبردست آگ لگنے سے کروڑوں روپے مالیت کا الیکٹرانک سامان ، گھریلو سامان ، فرنیچر اور دیگر اشیاءجل کر راکھ ہو گئیں۔ یہ راحت کی بات ہے کہ حادثے میں کوئی جانی نقصان نہیں ہوا۔ فائر بریگیڈ نے تقریباً دو گھنٹے کی محنت کے بعد آگ پر مکمل قابو پالیا۔ فی الحال آگ لگنے کی وجوہات کا پتہ لگایا جا رہا ہے۔ پولیس نے مقدمہ درج کر کے تفتیش شروع کر دی ہے۔ کرائم ٹیم اور ایف ایس ایل نے جائے وقوعہ سے شواہد اکٹھے کر لیے ہیں۔
فائر بریگیڈ کے پبلک ریلیشن آفیسر راجیندر اٹوال کے مطابق بدھ کی صبح تقریباً 4:15 بجے اتم نگر میں میٹرو پلر نمبر 663 کے قریب وجے سیلز شوروم میں آگ لگ گئی۔ فائر بریگیڈ کی نو گاڑیوں کو فوری طور پر جائے وقوعہ پر روانہ کیا گیا۔ آگ کو تیزی سے پھیلتا دیکھ کر آگ کو میک 6 فائر قرار دے دیا گیا اور فائر بریگیڈ کی اضافی گاڑیوں کو طلب کیا گیا، مقامی پولیس ، پی سی آر کا سامان، اور ایمبولینسیں بھی پہنچ گئیں۔
تقریباً 350 گز پر پھیلا ہوا یہ شوروم ایک تہہ خانے، ایک گراو ¿نڈ فلور اور اوپر کی تین منزلوں پر مشتمل ہے۔ شوروم کو وسعت دینے کے لیے، وجے سیلز نے ملحقہ عمارت کی تیسری اور چوتھی منزل کو بھی شامل کیا ، جس تک رسائی مرکزی عمارت کے ذریعے بنائی گئی تھی۔ ابتدائی تحقیقات سے پتہ چلتا ہے کہ آگ تیسری منزل سے شروع ہوئی اور تیزی سے پوری عمارت کو اپنی لپیٹ میں لے لیا۔ آگ کے شعلے اس قدر شدید تھے کہ پورے علاقے میں دھوئیں کے بادل پھیل گئے۔
فائر بریگیڈنے بروقت آگ کو قریبی دکانوں اور عمارتوں تک پھیلنے سے روکنے میں کامیابی حاصل کی۔ وجے سیلز سے متصل باٹا شوروم کو آگ تک پہنچنے سے روک دیا گیا ، حالانکہ اس کے اوپر والے فرش ، جو وجے سیلز کے زیر استعمال تھے ، مکمل طور پر جل کر خاکستر ہو گئے۔
حکام کے مطابق آگ پر صبح 5 بج کر 55 منٹ پر قابو پا لیا گیا اور تقریباً ساڑھے 6 بجے تک مکمل طور پر بجھا دیا گیا جس کے بعد دوپہر تک کولنگ اور سرچ آپریشن جاری رہا تاکہ آگ دوبارہ بھڑکنے سے روکا جا سکے۔آگ نے شوروم میں رکھی مہنگی الیکٹرانکس ، ایئر کنڈیشنر ، فریج ، ٹیلی ویژن ، واشنگ مشین ، فرنیچر اور دیگر سامان مکمل طور پر تباہ کر دیا۔ نقصان کا تخمینہ لگایا جا رہا ہے۔
پولیس اس بات کی بھی تحقیقات کر رہی ہے کہ آگ شارٹ سرکٹ، خرابی یا کوئی اور وجہ سے لگی۔ ایف ایس ایل اور کرائم ٹیم کی رپورٹس کی بنیاد پر مزید کارروائی کی جائے گی۔