غزہ میں اسرائیلی حملوں میں مزید100فلسطینی شہید

غزہ : غزہ میں اسرائیل کی بربریت جاری ہے،تازہ حملوں میں مزید 100 فلسطینی شہید ہو گئے۔غیر ملکی میڈیا کی رپورٹ کے مطابق غزہ میں اسرائیلی حملوں میں تیزی آگئی ہے، ہفتہ کو غزہ پر اسرائیلی حملوں میں کم ازکم 100 فلسطینی شہید ہوگئے جن میں سے 75 فلسطینی بیت لاھیا کی رہائشی عمارتوں پر بمباری میں شہید ہوئے۔اس کے علاوہ جنوبی غزہ کے شہرخان یونس پر اسرائیل کی بمباری میں17 افرا دشہید ہوئے، اسرائیلی طیاروں نے خان یونس میں 2 مقامات کو نشانہ بنایا۔غزہ میں خوراک تقسیم کے دوران اسرائیلی حملے میں 3 امدادی کارکن بھی شہید ہوئے، حملے کے بعد امدادی ادارے نے غزہ میں خوراک تقسیم کا کام بند کر دیا۔رپورٹ کے مطابق شمالی غزہ میں اسرائیلی محاصرے کے دوران وحشیانہ زمینی اور فضائی حملوں میں 2700 فلسطینی شہید ہو چکے ہیں۔رپورٹ میں بتایا گیا ہے کہ غزہ میں فلسطینیوں کو سنگین غذائی بحران کی صورتحال کا سامنا ہے۔ امریکی فوج کی سینٹرل کمانڈ کا کہنا ہے کہ میجر جنرل جیسپر جیفرز کو اسرائیل اور حزب اللہ کے درمیان جنگ بندی کی نگرانی میں مدد کے لیے بیروت میں تعینات کر دیا گیا ہے۔فلسطین کی وزارت صحت کے مطابق 7 اکتوبر 2023 سے اب تک اسرائیلی حملوں میں 44 ہزار 382 فلسطینی شہید ہوئے جبکہ اسرائیلی حملوں میں مجموعی طور پر ایک لاکھ 5 ہزار 142 فلسطینی زخمی بھی ہوئے۔ادھر لبنان پر اسرائیلی حملوں میں اب تک 3 ہزار 961 افراد شہید، 16ہزار 520 زخمی ہوئے۔دوسری طرف گزشتہ2 ماہ کے دوران شمالی غزہ کے جاری اسرائیلی محاصرے میں وحشیانہ زمینی اور فضائی حملوں میں شہدا کی تعداد 2 ہزار 700 تک پہنچ گئی ہے۔ دریں اثنا غزہ میں فلسطینیوں کو سنگین غذائی بحران کا سامنا ہے، ایک بیکری کے باہر ہجوم میں بھگدڑ کے دوران 3 خواتین جاں بحق ہو گئیں۔ ورلڈ فوڈ پروگرام سے فوری طور پر خوراک کی تقسیم دوبارہ شروع کرنے کی اپیل کی گئی ہے۔دوسری جانب لبنان میں جنگ بندی کے چوتھے روز حزب اللہ کے سربراہ سید نعیم قاسم نے سرحد پار حملوں اور اسرائیلی افواج کے ساتھ کئی مہینوں کی لڑائی کے بعد فتح کا اعلان کر دیا ہے۔ نعیم قاسم نے کارکنوں سے خطاب میں کہا کہ حالیہ جنگ بندی اسرائیل کے خلاف دو ہزار 6کی فتح سے بڑی کامیابی ہے۔ہم میدان جنگ میں ثابت قدم رہے اس لیے دشمن جنگ بندی پر مجبور ہوا۔ لندن میں غزہ اور لبنان جنگ میں جاری اسرائیلی قتل عام کے خلاف بڑا احتجاج کیا گیا۔ جنگ مخالف تنظیموں کا اسرائیلی مظالم کے خلاف قومی سطح کا یہ 22 واں احتجاج تھا۔