شاہ رخ کی فلمیں خلیجی ممالک میں بھی سرفہرست

ممبئی :شاہ رخ خان اب خلیجی ممالک میں سب سے زیادہ کمائی کرنے والی فلم دینے کے معاملے میں سرفہرست ہو گئے ہیں۔ وہ پربھاس کی فلم ’باہوبلی 2‘ جس نےگلف باکس آفس پر 86.12 کروڑ روپے کی کمائی کی تھی،کو پیچھے چھوڑکر نمبر ون بن گئے ہیں ۔قابل ذکر ہے کہ شاہ رخ کچھ سالوں کے بریک کے بعد 2023 میں کچھ بہترین فلموں کے ساتھ بڑے پردے پر نمودار ہوئے تھے۔ ان کی یکے بعد دیگرے تین فلمیں ریلیز ہوئی تھیں اور تینوں نے ہی باکس آفس پر کامیابی کے پرچم لہرائے تھے۔ سب سے پہلے فلم ’پٹھان‘ آئی، پھر ’جوان‘ نے کئی سارے ریکارڈ توڑ ڈالے، اور پھر ’ڈنکی‘ نے بھی فلم شائقین کو خوب محظوظ کیا۔ ان تین فلموں میں ’جوان‘ اور ’پٹھان‘ نے گلف باکس آفس پر خوب کمائی کی۔
باکس آفس ورلڈ وائیڈ کی ایکر پورٹ کے مطابق 2017 میں ریلیز ہوئی پربھاس کی فلم ’باہوبلی 2‘ نے خلیجی ممالک میں مجموعی طور پر 86.12 کروڑ روپے کی کمائی کی تھی اور تب سے سب سے زیادہ کمائی کرنے والی ہندوستانی فلم بنی ہوئی تھی۔ لیکن اب شاہ رخ خان کی فلم ’جوان‘ اور ’پٹھان‘ دونوں نے ہی کمائی کے معاملے میں ’باہوبلی 2‘ کو پیچھے چھوڑ دیا ہے۔ رپورٹ کے مطابق فلم ’جوان‘ نے گلف باکس آفس پر 147.86 کروڑ روپے کا کلیکشن کیا ہے اور نمبر 1 مقام پر قابض ہو گئی ہے۔ دوسرے مقام پر ’پٹھان‘ ہے جس نے 118.61 کروڑ روپے کمائے ہیں۔ ’باہوبلی 2‘ تیسرے نمبر پر پہنچ گئی ہے اور چوتھے نمبر پر سلمان خان کی ’بجرنگی بھائی جان‘ (78.85 کروڑ روپے) ہے۔ پانچواں مقام عامر خان کی فلم ’دنگل‘ (73.52 کروڑ روپے) کو حاصل ہے۔