دہلی کے گرین ٹرانسپورٹ سسٹم کو ملیں200 نئی ای وی بسیں

ڈی ٹی سی کی ای وی بسوں کا بیڑا 5000 سے تجاوز کر گیا

نئی دہلی، 19 اگست(میرا وطن نیوز)
دہلی کے لیفٹیننٹ گورنر سردار ترنجیت سنگھ سندھو اور وزیر اعلیٰ ریکھا گپتا نے بدھ کو دہلی کے رہائشیوں کے لیے 200 نئی زیرو ایمیشن الیکٹرک بسوں کو جھنڈی دکھا کر روانہ کیا۔ اس تقریب کے دوران دہلی-کرنال بین ریاستی ای بس سروس بھی شروع کی گئی۔ یہ صاف اور آسان پبلک ٹرانسپورٹ کے ذریعے دہلی کو ہریانہ کے بڑے شہروں سے جوڑنے کی ایک اہم پہل ہے۔
خواتین اور طالبات کے لیے محفوظ، آسان اور باوقار سفر کو ترجیح دیتے ہوئے، ایک ’لیڈیز اسپیشل‘ بس سروس کا بھی افتتاح کیا گیا۔ مزید برآں، ڈی ٹی سی کے راج گھاٹ ڈپو-1 میں ایک پبلک ای وی چارجنگ اسٹیشن کھولا گیا۔ یہ دہلی میں الیکٹرک گاڑیوں کے بڑھتے ہوئے نیٹ ورک کے لیے ضروری چارجنگ انفراسٹرکچر فراہم کرنے کی جانب ایک اہم قدم ہے۔ اس موقع پر وزیر ٹرانسپورٹ ڈاکٹر پنکج کمار سنگھ، ایم ایل اے سوریہ پرکاش کھتری، اور دیگر موجود تھے۔
قابل ذکرہے کہ200 الیکٹرک بسوں کے نئے بیڑے میں 88 معیاری 12 میٹر ای وی بسیں اور 112 ‘دیوی’ (9 میٹر) ای وی بسیں شامل ہیں۔ ان بسوں کی شمولیت کے ساتھ ہی دہلی کے الیکٹرک بسوں کے بیڑے نے 5000 کا ہندسہ عبور کر لیا ہے۔ یہ نئی ای وی بسیں کم منزل اور ایئر کنڈیشنڈ ہیں ۔ دہلی نے ملک کے سب سے بڑے الیکٹرک بسوں کے بیڑے کے ساتھ شہر کے طور پر اپنی پوزیشن مزید مستحکم کر لی ہے۔ سرکارکے منصوبے کے تحت مقصد دہلی کے بسوں کے بیڑے کو 2028-29 مالی سال تک تقریباً 14ہزاربسوں تک پھیلانا ہے، جس میں تمام ڈی ٹی سی بسوں کو الیکٹرک گاڑیوں میں منتقل کیا جائے گا۔