نرمل جین نے دہلی اقلیتی کمیشن کے چیئرمین کا عہدہ سنبھالا

کمیشن کے ز یر التوا کا مو ں کو تیز کرنے کےلئے کریں گے کام
دہلی اقلیتی کمیشن چیئرمین کا عہدہ 2023 سے خالی تھا
اب تین سال کے بعد کمیشن میں ہوسکے گا کام کاج

نئی دہلی،3اگست (میرا وطن نیوز )
دہلی اقلیتی کمیشن کے نئے چیئرمین نرمل جین نے پیر کوکمیشن کے دو دیگر ارکان قاری محمد ہارون اور سردار کلدیپ سنگھ کے ساتھ عہدہ سنبھال لیا۔ آج آئی ٹی او واقع کمیشن کے دفتر میں اس ذمہ داری کو سنبھا لنے کے بعد، نرمل جین نے کہا کہ وہ دہلی اقلیتی کمیشن کے ذریعہ اقلیتی برادری کے لئے چلائی جارہی تمام اسکیموں کے موثر نفاذ کو یقینی بنانے کی کوشش کریں گے۔
اس موقع پر نرمل جین نے کہا کہ دہلی اقلیتی کمیشن کے چیئرمین کا عہدہ 2023 سے خالی تھا۔ انہوں نے قومی قیادت اور دہلی کی وزیر اعلیٰ ریکھا گپتا کا شکریہ ادا کیا کہ انہوں نے تین سال تک یہ عہدہ خالی رہنے کے بعد انہیں یہ ذمہ داری سونپ دی۔ انہوں نے کہا کہ وہ اس بات کو یقینی بنانے کے لیے کام کریں گے کہ اقلیتی برادری کے ارکان کو مرکز اور دہلی سرکار کی مرکزی سرکار کی طرف سے وضع کردہ تمام اسکیموں کا فائدہ ملے۔ انہوں نے کہا کہ وہ اور دو دیگر اراکین اقلیتی برادری کے لیے مل کر کام کریں گے، یہ تسلیم کرتے ہوئے کہ یہ ایک اہم ذمہ داری ہے جسے وہ پوری لگن کے ساتھ نبھائیں گے۔
اس موقع پرکمیشن کے رکن قاری محمد ہارون نے بتایا کہ انہوں نے آج عہدہ سنبھالا ہے اور کمیشن کے ز یر التوا کا مو ں کو تیز کرنے کے لیے کام کریں گے۔ انہوں نے اس بات کو یقینی بنانے کے اپنے عزم پر زور دیا کہ اقلیتی برادری کے تمام افراد اسکیموں سے مستفید ہوں اور ان کے کام کو بروقت مکمل کیا جائے ۔ قاری محمد ہارون نے مزید کہا کہ وہ دہلی سرکارکے اقدامات کو اقلیتی برادری کے تمام طبقات یعنی جین، مسلمان، سکھ اور عیسائی تک لے جائیں گے۔
اس دوران کمیشن کے دوسرے رکن سردار کلدیپ سنگھ نے کہا کہ اقلیتی برادری سے متعلق جو بھی معاملا ت ان کے سامنے لائے جائیں گے ان کو فوری طور پر حل کیا جائے گا۔ انہوں نے دہلی سرکار کی طرف سے انہیں سونپی گئی ذمہ داری کو سخت محنت اور لگن کے ساتھ نبھانے کا عہد کیا، انہوں نے کہا کہ وہ جاری اسکیموں کو مکمل کرنے اور پہلے سے رکے ہوئے کاموں کو حل کرنے کو ترجیح دیں گے۔