او-زون کے تحت آنے والی کالونیو ں میں ایک بھی مکان کو گرانے کی اجازت نہیں دی جائے گی

نئی دہلی ،25مئی (میرا وطن نیوز )
جنوبی دہلی کے ممبر پارلیمنٹ رام ویر سنگھ بدھوڑی کی رہائش گاہ پر بدر پور اسمبلی حلقہ کی آر ڈبلیو ایزاور سماجی تنظیموں کے عہدیداروں کے ساتھ اہم میٹنگ ہوئی۔ اس دوران نہر کے اس پا ر کے علاقوں سے ‘O-Zone’ کی درجہ بندی کو ہٹانے اور بدر پور علاقے کے اندر ترقیاتی کاموں کو تیز کرنے پر توجہ مرکوز کی گئی۔ تمام لوگوں نے وزیر اعلیٰ ریکھا گپتاکا بدر پور اسمبلی حلقہ کی ترقی کے لیے 150 کروڑ رو پے کی رقم دستیاب کرانے کے لیےشکریہ ادا کیا۔
اس موقع پر بدھوڑی نے میٹنگ میں موجود لوگوں کو یقین دلایا کہ او-زون کے تحت آنے والی کالونیو ں میں ایک بھی مکان کو گرانے کی اجازت نہیں دی جائے گی،خاص طور پر وہ جو کہ 2008 میں ریگو لرائز کیے گئے تھے۔ فی الحال، مٹھی بھر افراد افواہیں پھیلا کر مرکزی سرکار کو بدنام کرنے کی سازش کر ر ہے ہیں۔ اس سے الجھنے یا گھبرانے کی ضرورت نہیں ہے۔
انہوں نے کہا کہ مرکزی سرکار اس خطے کی ترقی پر پوری توجہ دے رہی ہے۔ ہائی وے اور ایکو پارک مکمل ہو چکے ہیں۔ میٹھا پور سے میٹرو خدمات کو بڑھانے کے منصوبے کو مرکزی اور دہلی دونوں سرکار وںنے منظوری دے دی ہے۔ میں مہرولی-بدر پور روڈ کو چوڑا کرنے کے منصوبے کو منظوری دینے کے لیے وزیر اعلیٰ کا شکریہ ادا کرتا ہوں۔ میں نے سب کو یقین دلایا ہے کہ O-Zone کی درجہ بندی کو ختم کرنے کے لیے ہر ممکن کوشش کی جا رہی ہے۔
انہوںنے واضح طور پر کہا کہ فلڈ ڈپارٹمنٹ اور ایم سی ڈی کے ذریعہ کالونی میں اس وقت لگائے گئے ‘او-زون’ سائن بورڈز سے ان کا قطعی طور پر کوئی تعلق نہیں ہے۔ انہوں نے واضح کیا کہ یہ سائن بورڈ ہائی کورٹ کے جاری کردہ احکامات کی تعمیل میں لگائے جا رہے ہیں۔اس کے باوجود ایم پی نے مقامی باشندوں کو یقین دلایا اور میڈیا کے سامنے ایک اہم وعدہ کیا۔ انہوں نے اعلان کیا کہ جب تک میں یہاں ہوں کسی کا گھر نہیں گرایا جائے گا، لوگوں کو ڈرنے یا گھبرانے کی ضرورت نہیں ہے۔
انہوں نے بتایا کہ ان کے دور حکومت میں 24 مارچ 2008 کو نہر کے اس پار واقع 45 کالونیوں کے لیے ریگولرائزیشن سرٹیفکیٹ حاصل کیے گئے۔ ان کے مطابق، بعد ازاں – کانگریس کی سرکار کے دور میں، یہ پہلے سے باقاعدہ کالونیوں کو غلطی سے ایک مختلف زمرے میں دوبارہ درجہ بندی کر دیا گیا تھا۔انہوں نے زور دے کر کہا کہ اس وقت کے حکام اور سرکار کو واضح کرنا چاہیے تھا کہ یہ 45 کالونیا ں پہلے ہی ریگولرائز ہو چکی ہیں۔ تاہم، ایسا نہیں کیا گیا، ایک ناکامی جس کے نتیجے میں آج مکینوں میں الجھن کی کیفیت پائی جاتی ہے۔
ایم پی نے یہ بھی الزام لگایا کہ کالونی کے اندر کچھ لوگ اور اپوزیشن سے وابستہ لوگ عوام کو الجھانے اور گمراہ کرنے کی کوشش کر رہے ہیں۔ انہوں نے شہریوں سے اپیل کی کہ وہ ایسے افراد کی بیان بازی کا شکار نہ ہوں۔آخر میں، انہوں نے مقامی میڈیا کے سامنے اس بات کا اعادہ کیا: ’ہم اپنے حلقے کے مکینوں کے ساتھ مضبوطی سے کھڑے ہیں، اور جب تک ہم یہاں ہیں، ہم کالونی میں ایک گھر بھی گرانے نہیں دیں گے۔