رشمکا مندانا کی ڈیپ فیک ویڈیو معاملے میں کلیدی ملزم کو گرفتار

نئی دہلی :جنوبی ہند کی مشہور و معروف اداکارہ رشمکا مندانا کی ڈیپ فیک ویڈیو معاملے میں دہلی پولیس کی اسپیشل سیل نے کلیدی ملزم کو گرفتار کر لیا ہے اور جلد ہی اس سے پوچھ تاچھ کی کارروائی شروع ہوگی۔ رشمکا مندانا کی ڈیپ فیک ویڈیو معاملے میں دہلی پولیس نے گزشتہ سال 10 نومبر کو ایف آئی آر درج کی تھی اور تبھی سے سرگرمی کے ساتھ ملزم کی تلاش شروع ہو گئی تھی۔میڈیا رپورٹس کے مطابق گرفتار ملزم پہلے بھی کئی سائبر کرائم سے متعلق معاملوں میں شامل رہا ہے۔ اس نے نہ صرف رشمکا مندانا کی ڈیپ فیک ویڈیو بنائی، بلکہ وہ ایک ضعیف خاتون کو ڈیجیٹل طور پر یرغمال بھی بنا چکا ہے۔ امید ظاہر کی جا رہی ہے کہ پوچھ تاچھ کے دوران وہ مزید کئی معاملوں سے انکشاف کر سکتا ہے۔
گزشتہ سال 6 نومبر کو ایک ویڈیو سوشل میڈیا پر وائرل ہوئی تھی جس میں رشمکا مندانا لفٹ میں داخل ہوتی نظر آ رہی ہیں۔ یہ ویڈیو رشمکا مندانا کی نہیں تھی بلکہ کسی دیگر خاتون کے جسم پر رشمکا مندانا کا چہرہ فرضی طور پر لگا دیا گیا تھا۔ اس ویڈیو کو دیکھنے والا کوئی بھی شخص اسے رشمکا مندانا ہی سمجھے گا۔ جب اس ویڈیو پر رشمکا مندانا کی نظر پڑی تو انھوں نے سخت ناراضگی کا اظہار کیا اور دہلی پولیس میں اس معاملے کی شکایت درج کرائی۔ اس وقت دہلی پولیس نے چار لوگوں کو پکڑا تھا، اور اب کلیدی ملزم کی گرفتاری بھی عمل میں آ گئی ہے۔