چیف سکریٹری نریش کمار کی ملازمت میں توسیع کوسپریم کورٹ کی منظوری حاصل

نئی دہلی: سپریم کورٹ نے آج کو دہلی کے چیف سکریٹری نریش کمار کی مدت ملازمت میں توسیع کو منظوری فراہم کر دی۔ عدالت نے کہا کہ موجودہ قانون کے تحت مرکزی حکومت کو ایسا کرنے کا حق ہے۔ نریش کمار 30 نومبر کو ریٹائر ہونے والے تھے۔ مرکز انہیں 6 ماہ کی سروس ایکسٹینشن دینا چاہتا ہے، جبکہ ہی دہلی حکومت اس کی مخالفت کر رہی تھی۔
چیف جسٹس ڈی وائی چندر چوڑ، جسٹس جے بی پاردیوالا اور جسٹس منوج مشرا کی بنچ نے کیس کی سماعت کی۔ بنچ نے دہلی حکومت کی اس درخواست کو مسترد کر دیا جس میں چیف سکریٹری کے طور پر نریش کمار کی میعاد میں توسیع کو روکنے کی درخواست کی گئی تھی۔دہلی حکومت کی طرف سے پیش ہونے والے ایڈوکیٹ ڈاکٹر ابھیشیک منو سنگھوی نے دلیل دی کہ چیف سکریٹری سو دیگر معاملات سے نمٹ رہے ہیں، جو دہلی حکومت کے خصوصی ڈومین میں ہیں، اس لیے دہلی حکومت کو اپنے خیالات کا اظہار کرنے کا حق ہونا چاہیے۔ تاہم بنچ نے اس دلیل کو ماننے سے انکار کر دیا کہ چیف سکریٹری کے کاموں کو اسی طرح تقسیم کیا جانا چاہئے۔قبل ازیں منگل کو سماعت کے دوران عدالت نے کہا تھا کہ اگر مرکز چیف سکریٹری کی مدت ملازمت میں توسیع دینا چاہتا ہے تو وہ ان دفعات کو دکھائے جن کے تحت ایسا کیا جا سکتا ہے۔