سیرتِ مصطفیٰ ﷺ کے پیغام کو ڈیجیٹل میڈیا کے ذریعے عام کرنے پر زور

نئی دہلی،22ستمبر (میرا وطن نیوز)
جماعتِ اسلامی ہند، دہلی اسٹیٹ کی جانب سے سیرتِ مصطفیٰ ﷺ کے پیغام کو عام کرنے کے لیے چلائی گئی مہم ”واک وِد پروفیٹ محمد ﷺ“ کے تحت منعقدہ سوشل میڈیا اور ریل مقابلے کے فاتحین میں انعامات اور تمام شرکاء میں اسناد تقسیم کرنے کے لیے دی اسکالر اسکول، ابوالفضل انکلیو، نئی دہلی کے آڈیٹوریم میں ایک تقریب منعقد ہوئی۔
مہم کے کنوینر محمد اسلام انصاری نے مہم کا تعارف اور رپورٹ پیش کرتے ہوئے کہا کہ اس کا بنیادی مقصد نبی کریم ﷺ کی سیرت پر چلنے، آپ ﷺ کی تعلیمات کو اپنی زندگی میں اپنانے اور سیرتِ مصطفیٰ ﷺ کے پیغام کو سماجی ذرائع ابلاغ اور مختصر ویڈیوز کے ذریعے ہر عمر کے افراد تک پہنچانے کی ترغیب دینا تھا۔ اس سلسلے میں شرکاء نے نبی کریم ﷺ کے اخلاق، کردار، تعلیمات اور انسانی اقدار پر مبنی تخلیقی ویڈیوز تیار کرکے سماجی ذرائع ابلاغ کے ذریعے لوگوں تک پہنچائیں۔
مقابلے میں اول انعام 10 ہزار روپے، دوم انعام 5 ہزار روپے جبکہ پانچ شرکاء کو 2 ہزار روپے فی کس حوصلہ افزائی انعام سے نوازا گیا۔ تمام فاتحین کو انعامی رقم کے ساتھ اسناد پیش کی گئیں، جبکہ مقابلے میں حصہ لینے والے تمام شرکاء کو بھی شرکت کے سرٹیفکیٹ دیے گئے۔
اس موقع پر امیر حلقہ دہلی سلیم اللہ خان نے سماجی ذرائع ابلاغ کی وسیع رسائی کا ذکر کرتے ہوئے کہا کہ تخلیق کار اسے معلومات، تعلیم اور ابلاغ کے مؤثر ذریعے کے طور پر استعمال کرتے ہوئے سیرتِ مصطفیٰ ﷺ کے پیغام کو زیادہ سے زیادہ لوگوں تک پہنچائیں اور بامقصد، معیاری اور مثبت مواد تیار کریں۔
مہمان خصوصی اور معروف سماجی ذرائع ابلاغ کے تخلیق کار مکتوب محمد سعد نے، جو ’ریئلی مکتوب‘ نامی یوٹیوب چینل کے ذریعے اپنی شناخت رکھتے ہیں، شرکاء کو پیشہ ورانہ طور پر معیاری مواد تیار کرنے اور کہانی بیان کرنے کے فن کو ایک مؤثر ذریعہ بنانے کی ترغیب دی۔ انہوں نے کہا کہ معیاری اور تخلیقی مواد کے ذریعے اللہ کے کلام اور سیرتِ مصطفیٰ ﷺ کے پیغام کو وسیع پیمانے پر لوگوں تک پہنچایا جا سکتا ہے۔
تقریب کی نظامت امیر مقامی ظہور احمد نے کی۔ اس موقع پر مقابلے کے شرکاء، ان کے اہلِ خانہ، منتظمین اور دیگر افراد موجود تھے۔