وزیر اعلیٰ نے غازی پور ڈرین اور ہنڈن کینال پر 2 لین پر مشتمل سلپ روڈ پل کا افتتاح کیا

نئی دہلی، 13 اگست (میرا وطن نیوز)
وزیر اعلی ریکھا گپتا نے جمعرات کو مشرقی دہلی کے کونڈلی میں غازی پور ڈرین اور ہنڈن نہر پر نئے تعمیر شد ہ دو لین سلپ روڈ پل کا افتتاح کیا۔ اس موقع پر مرکزی وزیر مملکت اور مشرقی دہلی کے رکن پار لیمنٹ ہرش ملہوترا، دہلی کے تعمیرات عامہ کے وزیر پرویش صاحب سنگھ، پٹپڑ گنج کے ایم ایل اے رویندر سنگھ نیگی اور ترلوک پوری کے ایم ایل اے روی کانت موجود تھے۔
اس موقع پر مرکزی وزیر مملکت ہرش ملہوترا نے کہا کہ ان پلوں کی تعمیر سے ترلوک پوری، کونڈلی اور پٹپڑ گنج اسمبلی حلقوں کے ہزاروں شہریوں کو بہتر سڑک رابطہ، ہموار سفر اور زیادہ آسان نقل و حمل سے فائدہ ہوگا۔
وزیر اعلیٰ ریکھا گپتا نے کہا کہ کونڈلی میں یہ پروجیکٹ ایک بہتر منسلک، قابل رسائی اور ترقی یافتہ دہلی کی جانب ایک اور اہم قدم ہے۔ اس پروجیکٹ کے تحت کونڈلی پل پر غازی پور ڈرین اور ہنڈن کینال پر دو لین والے سلپ روڈ پل بنائے گئے ہیں۔ یہ راستہ چاند سنیما روڈ، غازی پور روڈ اور کونڈلی پل کے درمیان رابطے کو بہتر بنائے گا۔