تروپتی پرساد تنازعہ کو لے کرپون کلیان 11 روزہ ’اُپواس‘ پر

آندھرا پردیش میں تروپتی بالاجی مندر کے پرساد لڈو میں جانوروں کی چربی کے استعمال کی خبر کے بعد سے جاری سیاسی ہلچل تھمنے کے آثار نظر نہیں آ رہا ہے۔ اب اس معاملے میں ریاست کے نائب وزیر اعلیٰ اور اداکار پون کلیان نے کفارہ دینے کا فیصلہ کیا ہے۔ وہ آج سے 11 روزہ ’اُ پواس‘ یعنی روزہ رکھیں گے ۔ پون کلیان نے 11 دن کے اُپواس شروع کرنے یعنی روزہ رکھنے سے پہلے ایک پیغام بھی لکھا ہے۔ پون کلیان نے لکھا،’’ بھگوان بالاجی! مجھے معاف کر دے رب۔ تروملا لڈو پرساد جو کہ انتہائی مقدس سمجھا جاتا ہے… سابقہ ​​حکمرانوں کے بے لگام رجحانات کے نتیجے میں ناپاک ہو چکا تھا۔ جانور چربی کی باقیات سے آلودہ تھا۔ ایسے گناہ صرف ظالم دماغ والے ہی کرتے ہیں۔ شروع میں اس گناہ کو نہ پہچاننا ہندو ذات پر بدنما داغ کے مترادف ہے۔ جیسے ہی مجھے معلوم ہوا کہ لڈو پرساد میں جانوروں کی باقیات ہیں تو میں پریشان ہو گیا۔ میں مجرم محسوس کرتا ہوں۔ میں عوامی فلاح کے لیے لڑ رہا ہوں۔ افسوسناک بات یہ ہے کہ شروع میں ایسا مسئلہ میری توجہ میں نہیں آیا۔
انہوں نے مزید لکھا، “ہر وہ شخص جو سناتن دھرم میں یقین رکھتا ہے، اسے بھگوان بالاجی کے ساتھ کی گئی اس خوفناک بدکاری کا کفارہ دینا چاہیے۔ اسی جذبے کے تحت میں نے کفارہ شروع کرنے کا فیصلہ کیا ہے۔ اتوار یعنی 22 ستمبر، 2024 کی صبح، میں سری دشاوتارا وینکٹیشورا سوامی مندر، نمبور، ضلع گنٹور میں میں ’آپواس‘ شروع کروں گا۔ 11 دن تک دیکشا جاری رکھنے کے بعد، میں تروملا سری وینکٹیشور سوامی کے درشن کروں گا۔ ‘خدا… میں آپ سے التجا کرتا ہوں کہ مجھے ماضی کی حکومتوں کے ذریعہ آپ کے خلاف کیے گئے گناہوں کو دھونے کی طاقت عطا فرما۔