انڈیا اتحاد کے تمام سرکردہ لیڈران ایک پلیٹ فارم پر

جھارکھنڈ میں حالیہ اختتام پذیر اسمبلی انتخاب میں انڈیا اتحاد نے شاندار جیت حاصل کی ہے۔ 28 نومبر کو جھارکھنڈ میں ہیمنت سورین وزیر اعلیٰ کے طور پر حلف لینے والے ہیں۔ اس تقریب میں انڈیا اتحاد کے تمام سرکردہ لیڈران ایک پلیٹ فارم پر اکٹھا ہو کر اتحادی قوت کا مظاہرہ کریں گے۔ حلف برداری کی تقریب میں شامل ہونے والے سرکردہ لیڈران میں کانگریس کے قومی صدر ملکارجن کھڑگے، لوک سبھا میں حزب اختلاف کے لیڈر راہل گاندھی، این سی پی-ایس پی صدر شرد پوار، مغربی بنگال کی وزیر اعلیٰ اور ٹی ایم سی صدر ممتا بنرجی، عام آدمی پارٹی کے قومی کنوینر اروند کیجریوال، سماجوادی پارٹی کے صدر اکھلیش یادو، شیو سینا (یو بی ٹی) کے صدر ادھو ٹھاکرے اور سی پی آئی (ایم ایل) کے جنرل سکریٹری دیپانکر بھٹاچاریہ وغیرہ کا نام اہم ہے۔

ہیمنت سورین کی حلف برداری تقریب میں کئی ریاستوں کے وزرائے اعلیٰ اور مختلف سیاسی جماعتوں کے بڑے بڑے رہنما شامل ہوں گے۔ جو خبریں سامنے آ رہی ہیں اس کے مطابق میگھالیہ کے وزیر اعلیٰ کونراڈ سنگما، پنجاب کے وزیر اعلیٰ بھگونت مان، ہماچل پردیش کے وزیر اعلیٰ سکھوندر سنگھ سکھو، جموں و کشمیر کی سابق وزیر اعلیٰ محبوبہ مفتی، تمل ناڈو کے نائب وزیر اعلیٰ ادے اسٹالن، کرناٹک کے نائب وزیر اعلیٰ ڈی کے شیوکمار، بہار اسمبلی کے حزب مخالف لیڈر تیجسوی یادو، دہلی کے سابق نائب وزیر اعلیٰ منیش سسودیا، پورنیہ (بہار) سے رکن پارلیمنٹ راجیو رنجن عرف پپو یادو اور عام آدمی پارٹی کے راجیہ سبھا رکن سنجے سنگھ بھی اس تقریب میں موجود ہوں گے۔