شرد پوار کو مہاراشٹر کی صورتحال منی پور جیسی ہونے کا خدشہ

تھانے: این سی پی صدر شردپوار نے کہا کہ سماجی اتحاد ملک کی ترقی کے لئے لازمی ہے۔ انہوں نے مہاراشٹرا میں منی پور جیسی امکانی گڑبڑ پر سخت تشویش ظاہر کی۔انہوں نے تاہم وضاحت نہیں کی کہ وہ ایسا کیوں سونچتے ہیں۔ اتوار کی شام سماجی اتحاد کانفرنس سے خطاب میں شردپوار نے منی پور میں نسلی کشیدگی سے نمٹنے کے مرکز کے طریقہ کارپر بھی تنقید کی، جہاں گزشتہ برس مئی سے 200 سے زائد افراد ہلاک ہوچکے ہیں۔انہوں نے کہا کہ ہمارے ملک کی ترقی اور معاشی استحکام کے لئے سماجی اتحاد لازمی ہے۔کشیدگی اور پھوٹ ڈالنے کی موجودہ صورتحال تشویشناک ہے۔ ملک میں بلالحاظ مذہب و ملت، ذات پات و زبان اتحاد ضروری ہے۔ سماجی ہم آہنگی برقرار رکھنا لازمی ہے۔