این سی پی رکن پارلیمنٹ محمد فیضل کی لوک سبھا رکنیت پھر سے بحال

نئی دہلی :این سی پی رکن پارلیمنٹ محمد فیضل کی لوک سبھا رکنیت ایک بار پھر سے بحال کر دی گئی ہے۔ سپریم کورٹ کی ہدایت کے بعد لوک سبھا سکریٹریٹ نے 2 نومبر کو محمد فیضل کی لوک سبھا رکنیت بحال کرنے سے متعلق نوٹیفکیشن جاری کیا۔قابل ذکر ہے کہ محمد فیضل لکشدیپ سے رکن پارلیمنٹ ہیں۔ گزشتہ دنوں سپریم کورٹ نے قتل کی کوشش معاملے میں ان کی سزا کو ملتوی کر دیا تھا۔ اس فیصلے کو پیش نظر رکھتے ہوئے لوک سبھا جنرل سکریٹری اتپل کمار سنگھ کی طرف سے جاری ایک نوٹیفکیشن میں کہا گیا ہے کہ محمد فیضل کی ایوان سے نااہلیت عدالتی احکامات کے پیش نظر آگے اثر انداز نہیں رہے گی۔
واضح رہے کہ اس سے قبل کیرالہ ہائی کورٹ میں 2009 کے ایک قتل کی کوشش معاملے میں محمد فیضل کی سزا کو ملتوی کرنے سے منع کر دیا تھا۔ اس کے سبب رواں سال 4 اکتوبر کو دوسری بار انھیں لوک سبھا کے لیے نااہل قرار دے دیا گیا تھا۔ اس سے قبل لکشدیپ کے کاوارَتی کے ایک سیشن کورٹ کی طرف سے 10 سال قید اور ایک لاکھ روپے جرمانہ کی سزا سنائی گئی تھی اور پھر انھیں پہلی بار 11 جنوری کو ان کی لوک سبھا رکنیت ختم کر دی گئی تھی۔