سولر پالیسی دہلی میں پی ایم مودی کے ’پی ایم سوریہ گھر‘ ویزن کو نئی رفتار دے گی

3 کلو واٹ تک کی صلاحیت کے روف ٹاپ سولر سسٹم کو صفر کی لاگت پر کیا جائے گا نصب

نئی دہلی، یکم ستمبر(میرا وطن نیوز )
دہلی کے توانائی کے منظر نامے کو تبدیل کرنے کی طرف ایک بڑا قدم اٹھاتے ہوئے، ریکھا گپتا سرکار نے ہر گھر تک شمسی توانائی پہنچانے کے لیے دہلی سولر انرجی پالیسی کا ایک نیا ورزن (دوسری ترمیم) متعا رف کرایا ہے۔ نئی پالیسی کے تحت 2025-26 کے مالی سال میں اوسطاً 400 یونٹ تک بجلی استعمال کرنے والے گھریلو صارفین کے لیے بغیر کسی ابتدائی لاگت کے 3 کلو واٹ تک کی صلاحیت کے روف ٹاپ سولر سسٹم نصب کیے جائیں گے۔ قابل ذکر بات یہ ہے کہ 200 یونٹس تک استعمال کر نے والے صارفین نہ صرف سولر سسٹم لگانے کے بعد سبسڈی سے مستفید ہوتے رہیں گے بلکہ بجلی کی بچت پر توانائی کی بچت کی ترغیب بھی حاصل کریں گے۔
وزیراعلیٰ ریکھا گپتا نے کہا کہ وزیر اعظم نریندر مودی کے دہلی میں ’پی ایم سوریہ گھر: مفت بجلی یوجنا‘کے وزن کو مزید تقویت دیتے ہوئے سرکار نے ایک ایسا نظام وضع کیا ہے جو سولر سسٹم کی تنصیب کو آسان بناتا ہے اور اوسط خاندان کے لیے عملی طور پر مالی بوجھ سے آزاد ہوتا ہے۔ یہ پالیسی دہلی کے لوگوں کو بجلی کے استعمال کے ساتھ ساتھ پیدا کرنے کے قابل بنائے گی۔
وزیر اعلیٰ نے منگل کو دہلی سکریٹریٹ میں منعقدپریس کانفرنس میں دہلی سولر انرجی پالیسی-2023 (دوسری ترمیم) سے متعلق تفصیلات شیئر کیں۔دہلی میں شمسی توانائی کی بے پناہ صلاحیت ہے اورسرکا ر کا مقصد صرف بجلی کے بلوں کو کم کرنا نہیں ہے بلکہ دہلی کے گھرانوں کو بجلی پیدا کرنے والے یونٹوں میں تبدیل کرنا ہے۔ پریس کانفرنس کے دوران دہلی کے وزیر توانائی آشیش سود بھی موجود تھے۔
وزیر اعلیٰ ریکھا گپتا نے کہا کہ نئی اسکیم کے تحت، 400 یونٹس تک کی اوسط ماہانہ بجلی کی کھپت والے اہل گھریلو صارفین کو بغیر کسی پیشگی قیمت کے 3 کلو واٹ تک کا چھت والا شمسی نظام فراہم کیا جائے گا، جو تکنیکی فزیبلٹی سے مشروط ہے۔ مرکزی سرکارکی طرف سے فراہم کردہ 78ہزار سبسڈی کے علاوہ دہلی سرکار 78ہزار کی کیپٹل سبسڈی بھی فراہم کرے گی۔ مزید برآں، دہلی سرکار اضافی ٹاپ اپ فراہم کر کے سبسڈی کی رقم اور سولر پلانٹ کے ٹینڈر کے عمل کے ذریعے طے شدہ لاگت کے درمیان فرق کو پورا کرے گی۔