میٹرو اور سڑک کے منصوبوں میں تیزی لائی جائے گی:ریکھا گپتا

نئی دہلی، 12 اپریل(میرا وطن نیوز )
وزیر اعلیٰ ریکھا گپتا نے دہلی میٹرو اور اس سے منسلک سڑک اور فلائی اوور پروجیکٹوں کا تفصیلی جائزہ لیا ۔ انہوں نے کہا کہ بعض منصوبوں میں درپیش رکاوٹوں کو مسلسل دور کیا جا رہا ہے۔ میٹنگ میں انہیں بتایا گیا کہ موجودہ دہلی میٹرو نیٹ ورک 416 کلومیٹر پر پھیلا ہوا ہے جس میں 303 اسٹیشن، 12 لائنیں اور 32 انٹرچینج اسٹیشن شامل ہیں۔ مزید برآں، 104.45 کلومیٹر پر پھیلا ایک نیٹ ورک — جس میں 81 اسٹیشن شامل ہیں — فی الحال زیر تعمیر ہے۔ فیز IV کی ترجیحی راہداریوں پر نمایاں پیش رفت ہوئی ہے جس میں کل فزیکل پیش رفت 79.57 فیصد اور مالیاتی پیش رفت 80.60 فیصد تک پہنچ گئی ہے۔
اس موقع پروزیر اعلیٰ ریکھا گپتا نے کہا کہ دہلی میٹرو کی توسیع اور اس سے منسلک سڑکوں کے نیٹ ورک سے راجدھانی کی لائف لائن کو مضبوط بنایا جائے گا۔ یہ اقدام نہ صرف عوام کے لیے سفر کو تیز تر اور آسا ن بنائے گا بلکہ ٹریفک کی بھیڑ اور آلودگی میں بھی نمایاں کمی کا باعث بنے گا۔ انہوں نے ہدایت جاری کی کہ تمام منصوبوں کی باقاعدہ نگرانی کو یقینی بنایا جائے اور ان کی مقررہ مدت میں تکمیل کو یقینی بنایا جائے۔