ضلعی سطح کی کمیٹیاں راشننگ سسٹم کی نگرانی کےلئے بہتراقدامات کریں

نئی دہلی،9اپریل (میرا وطن نیوز )
اس بات کو یقینی بنانے کے لیے کہ دہلی کے غریبوں کو ان کا راشن مناسب طریقے سے اور وقت پر ملے، محکمہ خوراک اور فراہمی کے تحت ضلعی سطح کی چوکسی کمیٹیاں تشکیل دی گئی ہیں۔ جمعرات کوجنوبی اور جنو ب مشرقی اضلاع کے لیے چوکسی کمیٹیوں کی افتتاحی میٹنگ مقامی رکن پارلیمنٹ رام ویر سنگھ بدھوڑی کی صدارت میں منعقد ہوئی۔ اس دوران غریبوں کے مفادات کے تحفظ کے لیے تمام ضروری اقداما ت اٹھانے کی ہدایات جاری کی گئیں۔
میٹنگ کے بعدبدھوڑی نے بتایا کہ دونوں اضلاع سے اسسٹنٹ کمشنرز، فوڈ سپلائی آفیسر (ایف ایس او ) اور فوڈ اینڈ سپلائی ڈیپارٹمنٹ کے ممبران موجود تھے۔ انہوں نے بتایا کہ میٹنگ میں اس بات کو یقینی بنانے کی اہمیت پر زور دیا گیا کہ صارفین کو راشن کا پورا حق ملے، راشن کا معیار بہترین رہے، ان پر کوئی اضافی چارجز نہ لگائے جائیں، اور سپلائی بلا تعطل رہے۔ کمیٹی ان معیارات کی تعمیل کو یقینی بنانے کے لیے سخت نگرانی رکھے گی۔ نیشنل فوڈ سیکیورٹی ایکٹ کے تحت غریبوں کو مفت راشن اور فی الحال فراہم کیے جانے والے دیگر فوائد کی مناسب ترسیل کو یقینی بنانے کے لیے بھی اقدامات کیے جائیں گے۔