خواتین ٹی ٹوینٹی عالمی کپ:آسٹریلیا کے ہاتھوں ہندوستان کی 9 رنز سے شکست

خواتین ٹی ٹوینٹی عالمی کپ 2024 میں کل یعنی13 اکتوبر کو ہندوستانی ٹیم اور آسٹریلیا کے درمیان ایک انتہائی دلچسپ میچ کھیلا گیا۔ آخری اوور میں ہندوستانی ٹیم کو جیت کے لیے 14 رنز درکار تھے لیکن وہ اسکور نہ کرسکی۔ اس طرح کرو یا مرو کے اس مقابلے میں ہندوستانی ٹیم کو 9 رنز سے شکست کا منہ دیکھنا پڑا۔
میچ میں آسٹریلیا نے ٹاس جیت کر پہلے بیٹنگ کرتے ہوئے 152 رنز کا ہدف دیا۔ جواب میں ہندوستانی ٹیم 9 وکٹوں کے نقصان پر صرف 142 رنز بنا سکی اور میچ ہار گئی۔ اس شکست کے ساتھ ہی ہندوستانی ٹیم کا سفر اب ختم ہونے کے دہانے پر ہے۔میچ میں ہندوستانی ٹیم کی جانب سے کپتان ہرمن پریت کور 54 رنز بنانے کے بعد ناٹ آؤٹ رہیں تاہم وہ ٹیم کو فتح سے ہمکنار نہ کرا سکیں۔ ان کے علاوہ دیپتی شرما نے 29 رنز بنائے۔ جبکہ شیفالی ورما نے 20 رنز بنائے۔ ان کے علاوہ کوئی اور بلے باز اپنی چھاپ نہیں چھوڑ سکا۔
اب سب سے بڑا سوال یہ ہے کیا ہندوستانی ٹیم سیمی فائنل میں جائے گی یا نہیں؟ اس کا فیصلہ اب اس شکست کے بعد نیٹ رن ریٹ پر اٹکا ہوا ہے۔ دراصل آسٹریلیا کی ٹیم اپنے تمام 4 میچ جیت کر گروپ اے میں کوالیفائی کر چکی ہے۔ دوسرے نمبر پر ہندوستانی ٹیم 4 پوائنٹس کے ساتھ ہے جس کا نیٹ رن ریٹ پلس 0.322 ہے۔
نیوزی لینڈ صرف 4 پوائنٹس کے ساتھ تیسرے نمبر پر ہے۔ اس کا نیٹ رن ریٹ 0.282 ہے۔ اس گروپ کا آخری میچ اب نیوزی لینڈ اور پاکستان کے درمیان کھیلا جانا ہے۔ پاکستان 2 پوائنٹس کے ساتھ چوتھی پوزیشن پر ہے۔ اگر نیوزی لینڈ کی ٹیم یہ میچ جیت جاتی ہے تو وہ سیمی فائنل میں پہنچ جائے گی جب کہ ہندوستان اور پاکستان کی ٹیمیں باہر ہو جائیں گی۔ اگر پاکستانی ٹیم نیوزی لینڈ کو شکست دیتی ہے تو اس کے ہندوستان کے برابر 4 پوائنٹس ہو جائیں گے۔ پھر معاملہ نیٹ رن ریٹ پر پھنس جائے گا۔ اس صورت حال میں ہندوستان اور نیوزی لینڈ کے درمیان تصادم ہو سکتا ہے۔