منی پور میں سی آر پی ایف کی کارروائی- 11 عسکریت پسند ہلاک

منی پور میں سی آر پی ایف نے بڑی کارروائی کرتے ہوئے جیریبام میں 11 عسکریت پسندوں کو ہلاک کر دیا ہے۔ اس کارروائی میں ایک فوجی جوان کے زخمی ہونے کی خبر بھی سامنے آئی ہے، جسے فوری طور پر علاج کے لیے اسپتال منتقل کر دیا گیا ہے۔ سی آر پی ایف ذرائع کے مطابق عسکریت پسندوں نے سی آر پی ایف کی ٹیم پر حملہ کر دیا تھا، جس کے بعد یہ کارروائی کی گئی۔

منی پور میں گزشتہ 3 دنوں سے سیکورٹی فورسز نے زبردست تلاشی مہم چلائی ہوئی ہے۔ منی پور کی پہاڑی اور گھاٹی کے اضلاع میں تلاشی مہم کے دوران سیکورٹی فورسز نے کئی اسلحے، گولہ بارود اور آئی ای ڈی ضبط کیے ہیں۔ آسام رائفلز نے سوموار کو ایک بیان میں اس بات کی جانکاری دی کہ ہفتہ کو آسام رائفلز اور منی پور پولیس کی مشترکہ ٹیم نے ایک تلاشی مہم چلائی۔ جس کے تحت چورا چندر پور ضلع کے ایل کھونومفائی گاؤں سے متصل ایک جنگل سے ایک 303 رائفل، دو 9 ایم ایم پستول، چھ 12 سنگل بیرل رائفل، ایک 22 رائفل، گولہ بارود اور دیگر جنگی اشیاء ضبط کیے ہیں۔