دیوالی کے موقع پر 200 سے زائد خصوصی ٹرینیں چلانے کا اعلان

مغربی ریلوے نے دیوالی اور چھٹھ کے موقع پر 200 سے زائد خصوصی ٹرینیں چلانے کا اعلان کیا ہے۔اس تعلق سے ریلوے نے کہا ہے کہ منگل (29 اکتوبر) کو 120 سے زائد ٹرینیں چلائی جائیں گی۔ ان میں سے تقریباً 40 ٹرینوں کا انتظام ممبئی ڈویژن کے ذریعہ کیا جائے گا جس میں 22 ٹرینیں خصوصی طور سے اتر پردیش، بہار، مغربی بنگال اور اوڈیشہ کی مقبول منزلوں تک جائیں گی۔ اس سلسلے میں وزارت ریل نے منگل کو چلائی جانے والی فیسٹیول اسپیشل ٹرینوں کی فہرست بھی سوشل میڈیا سائٹ ‘ایکس’ پر شیئر کی ہے۔
وہیں وسط مشرقی ریلوے کے سی پی آر او سرسوتی چندر نے بتایا ہے کہ دیوالی اور چھٹھ پوجا کے دوران مسافروں کی اضافی بھیڑ کے پیش نظر ان کی سہولت کے لیے ریلوے کے ذریعہ کئی خصوصی ٹرینوں کو چلایا جا رہا ہے۔ اس سلسلہ میں 4 جوڑی اسپیشل ٹرینوں کی آمد و رفت کا انتظام کیا گیا ہے تاکہ مسافروں کو کسی بھی طرح کی پریشانی کا سامنا نہ کرنا پڑے۔ اس سلسلے میں گونا، ساگر کٹنی، پریاگ راج چِھوکی، پنڈت دین دیال اپادھیائے جنکشن کے راستے کوٹا اور داناپور کے درمیان گاڑی نمبر 09803/09804 کوٹا-داناپور-کوٹا اسپیشل ٹرین چلائی جا رہی ہے۔
سلی گوڑی، کشن گنج، کٹیہار، مکامہ کے راستے نیو جلپائی گوڑی اور پٹنہ جنکشن کے درمیان گاڑی نمبر 05739/05740 پٹنہ-نیوجلپائی گوڑی-پٹنہ اسپیشل ٹرینوں کا انتظام کیا گیا ہے۔ پورنیہ، بن منکھی، جانکی نگر، مرلی گنج کے راستے کٹیہار اور دورم مدھے پورہ کے درمیان گاڑی نمبر 07541/07542 کٹیہار-دورم مدھے پورہ-کٹیہار اسپیشل ٹرین چلائی جائے گی جبکہ نوگچھیا، مانسی، کھگڑیا، برونی، شاہ پور پٹوری، حاجی پور، سونپور کے راستے کٹیہار اور چھپرہ کے درمیان گاڑی نمبر 05744/05743 کٹیہار-چھپرہ-کٹیہار اسپیشل ٹرین مسافروں کی سہولت کے لیے چلائی جائے گی۔