مغربی بنگال میں کنچنجنگا ایکسپریس کی مال گاڑی سے ٹکر، 5ہلاک ۔30زخمی

کولکتہ: مغربی بنگال کے رنگاپانی اسٹیشن کے قریب پیر کو سیالدہ جانے والی کنچنجنگا ایکسپریس کے ساتھ مال گاڑی کے تصادم کے بعد کم از کم پانچ افراد کی موت ہو گئی اور تقریباً 30 دیگر زخمی ہو گئے۔شمالی بنگال کے نیو جلپائی گوڑی اسٹیشن سے تقریباً سات کلومیٹر دور جائے وقوعہ پر امدادی کارروائیاں جاری ہیں اور زخمیوں کو قریبی اسپتالوں میں منتقل کیا جا رہا ہے۔
ایک سینئر پولیس افسر نے بتایا، ’’حادثے میں اب تک پانچ افراد کی موت ہو چکی ہے اور تقریباً 30 لوگ زخمی ہوئے ہیں، جو جان لیوا نہیں ہیں۔دریں اثنا، ریلوے کے وزیر اشونی ویشنو نے ایکس پر کہاکہ این ایف آر زون میں بدقسمتی سے حادثہ پیش آیا ہے۔ ریسکیو آپریشن جنگی بنیادوں پر جاری ہے۔ ریلوے، این ڈی آر ایف اور ایس ڈی آر ایف قریبی تال میل سے کام کر رہے ہیں۔ زخمیوں کو ہسپتال منتقل کیا جا رہا ہے۔ سینئر حکام موقع پر پہنچ گئے ہیں۔