نئے سال کے موقع پر پورے ملک میں زبردست حفاظتی انتظامات

نئی دہلی: کچھ گھنٹوں کے بعد پورا ملک نئے سال کے جشن میں ڈوب جائے گا۔ شمال سے جنوب اور مشرق سے مغرب تک سکیورٹی کے انتظامات مکمل کیے گئے ہیں۔ کسی بھی ناخوشگوار صورتحال سے نمٹنے کے لیے انتظامیہ تیار ہے۔ اتر پردیش میں مذہبی مقامات کی سکیورٹی بڑھا دی گئی ہے، جھارکھنڈ میں ڈیم کے ارد گرد اسٹاٹک فورسز کی تعیناتی کی گئی ہے، پنجاب میں بھی انتظامات درست ہیں اور چنئی میں ڈرون اور سی سی ٹی وی کے ساتھ 25000 پولیس اہلکار تعینات کیے گئے ہیں۔
راجدھانی دہلی میں پولیس نے ان تمام علاقوں کی نشاندہی کر لی ہے جہاں نئے سال کی خوشیوں کے دوران گاڑیوں کا دباؤ زیادہ ہو سکتا ہے۔ جنوبی دہلی کے ڈی سی پی انکت چوہان نے کہا کہ ان حساس علاقوں میں اضافی فورسز تعینات کی گئی ہیں جو عوامی سرگرمیوں پر نظر رکھیں گے۔
انہوں نے کہا کہ عام طور پر نئے سال کے موقع پر لوگ نشے میں گاڑی چلاتے ہوئے نظر آتے ہیں، جسے مدنظر رکھتے ہوئے 21 اہم مقامات پر سانس کی جانچ کرنے والی سکیورٹی چوکیاں لگائی گئی ہیں۔ اسی طرح، فوری ردعمل ٹیم (کیو آر ٹی) 15 اہم مقامات پر تعینات کی جائیں گی اور 38 پی سی آر وین بھی تعینات کی جائیں گی۔
یو پی: ریاست میں خواتین کی حفاظت کے لیے خصوصی انتظامات کیے گئے ہیں۔ پولیس نے تمام شہروں میں فلیگ مارچ کا حکم دیا ہے اور مذہبی مقامات کی سکیورٹی کو مزید بڑھا دیا گیا ہے۔ اس کے علاوہ، ممکنہ ہجوم کے پیش نظر، ریاست کے اہم مندروں اور مذہبی مقامات پر پولیس فورسز کو مزید تعینات کیا گیا ہے۔
بہار: یہاں بھی نئے سال کی رات کے دوران سکیورٹی کے انتظامات کیے گئے ہیں۔ بہار کے پولیس افسر پون کمار نے کہا کہ اگر کسی نے حکومتی ہدایات کی خلاف ورزی کی تو اس کے خلاف قانونی کارروائی کی جائے گی۔
جھارکھنڈ: ریاست میں سیاحتی مقامات اور اہم پارکوں کے قریب اضافی فورسز کو تعینات کیا گیا ہے۔ جھارکھنڈ پولیس نے کہا کہ نئے سال کی تقریبات اور پارٹیز پر گہری نظر رکھی جائے گی، اور سکیورٹی کا سخت انتظام کیا جائے گا۔
چنئی: تمل ناڈو پولیس نے چنئی اور اس کے گردونواح میں 25000 پولیس اہلکار تعینات کیے ہیں۔ ان اہلکاروں کو ڈرون اور سی سی ٹی وی کے ذریعے نگرانی کی جائے گی۔ اس کے علاوہ، چنئی شہر کے ساحلی علاقوں اور دیگر اہم مقامات پر پولیس کی سخت نگرانی رکھی جائے گی۔
پولیس نے عوامی مقامات اور رہائشی علاقوں میں آتشبازی پر پابندی عائد کر دی ہے، اور لاؤڈ اسپیکرز کے استعمال کے لیے متعلقہ حکام سے اجازت لینا ضروری قرار دیا گیا ہے۔