شادی ملتوی ہونے پر مشتعل نوجوان نے نابالغ منگیتر کا سر قلم کردیا

نئی دہلی:کرناٹک میںپرکاش نامی ایک شخص نے اپنی 16 سالہ منگیتر مینا کو مارا پیٹا اور مبینہ طور پر اس کا سرقلم کر کٹا ہوا سر لے کر فرار ہوگیا۔ پولیس نے اطلاع ملنے پر پرکاش کی تلاش شروع کردی۔ میڈیا کی خبروںکے مطابق کرناٹک پولیس نے دلہن کی عمر 16 سال ہونے کی وجہ سے مداخلت کر کے شادی کی تقریب رکوا کر اہل خاندان سے کہاتھا کہ دو سال بعد جب بچی 18 سال کی ہو جائے تو شادی کی جائے۔ پولیس کی ہدایت پرلڑکی کے اہل خاندان نے شادی کی تقریب ملتوی کردی۔لیکن جب شادی کے ملتوی ہونے کی اطلاع دلہے پرکاش کو پہنچی تو وہ مشتعل ہوگیا اور سسرال پہنچ کر ہنگامہ آرائی کی۔اس نے اپنی 16 سالہ منگیتر مینا کو مارا پیٹا اور مبینہ طور پر اس کا سرقلم کر کٹا ہوا سر لے کر فرار ہوگیا۔ پولیس نے اطلاع ملنے پر پرکاش کی تلاش شروع کردی ہے۔پولیس نے پرکاش کے خلاف تعزیرات ہند کی دفعہ 307 (قتل کی کوشش) اور 302 (قتل) اور جنسی جرائم کے خلاف بچوں کے تحفظ کے قانون کی متعلقہ دفعات کے تحت مقدمہ درج کرلیاہے۔