آلودگی کے خلاف حکومت کا ‘مہا سنکلپ’

نئی دہلی،10جنوری (میرا وطن)
وزیر اعلیٰ ریکھا گپتا کی قیادت میں دہلی سرکارنے راجدھانی کے ٹرانسپورٹ سسٹم کو مکمل طور پر ‘سبز’ بنانے اور فیصلہ کن طور پر آلودگی سے نمٹنے کی سمت میں ایک بڑا قدم اٹھایا ہے۔ وزیر اعلیٰ کے وڑن کے مطابق، دہلی ٹرانسپورٹ ڈپارٹمنٹ نے 3,330 اضافی الیکٹرک بسوں کی فوری خریداری کے لیے مرکزی سرکارکی ایجنسی، کنورجینس انرجی سروسز لمیٹڈ (سی ای ایس ایل) کو ایک تفصیلی تجویز پیش کی ہے۔
وزیر اعلیٰ ریکھا گپتا نے واضح کیا ہے کہ راجدھانی کی ہوا کو صاف کرنا اور شہریوں کو جدید، قابل رسائی اور سستی پبلک ٹرانسپورٹ سروس فراہم کرنا ان کی حکومت کی اولین ترجیحات ہیں۔ اس مقصد کے لیے، سی ای ایس ایل کے ساتھ حالیہ اعلیٰ سطحی میٹنگ کے بعد، پی ایم ای ڈرائیو اسکیم (فیز 2) کے تحت دہلی کے لیے بس کوٹہ بڑھانے کا فیصلہ کیا گیا۔
وزیر اعلیٰ نے بتایا کہ راجدھانی کے محکمہ ٹرانسپورٹ نے 3,330 بسوں کا مطالبہ کیا ہے، جس میں 500 7 میٹر بسیں، 2,330 9 میٹر بسیں اور 500 12 میٹر بسیں شامل ہیں۔ تمام بسیں لو فلور اے سی بسیں ہوں گی۔ 7 میٹر لمبی بسیں دہلی والوں کو تنگ سڑکوں اور آخری میل تک رسائی فراہم کریں گی۔ 9 میٹر لمبی بسیں چھوٹی سڑکوں اور فیڈر سروسز پر چلیں گی۔ 12 میٹر لمبی بسیں مرکزی راستوں اور بہت زیادہ رش والے راستوں پر چلیں گی۔
وزیر اعلیٰ نے کہا کہ ان کی سرکار نے مرکزی سرکار اور بھاری صنعتوں کی وزارت سے درخواست کی ہے کہ وہ دہلی کی اس اضافی مانگ کو سبسڈی ماڈل میں شامل کریں، جو 2,800 بسوں کے پہلے سے مختص کوٹے سے زیادہ ہے۔وزیر اعلیٰ کا خیال ہے کہ یہ 3,330 نئی بسیں نہ صرف عوامی نقل و حمل کا ذریعہ فراہم کریں گی بلکہ دہلی کی “گرین ٹرانزیشن” کی بنیاد بھی بنائیں گی۔ ان بسوں کی آمد سے دہلی والوں کا پرائیویٹ گاڑیوں پر انحصار کم ہو جائے گا۔ مزید برآں، نقصان دہ فضائی آلودگی میں کمی آئے گی۔پرائم منسٹر ای ڈرائیو اسکیم مرکزی سرکار کی ایک انقلابی پہل ہے جسے بھاری صنعتوں کی وزارت نے اکتوبر 2024 سے مارچ 2026 تک 10,900 کروڑ کے بجٹ کے ساتھ لاگو کیا ہے