کارکردگی کی سرکار ہے، پوسٹروں کی نہیں:ریکھا گپتا

انہوںنے دہلی کو اشتہارات میں الجھایا، ہم نے حل کا راستہ دکھایا

نئی دہلی، 20 فروری(میرا وطن)
دہلی سرکار کے ایک سال مکمل ہونے پر وزیر اعلیٰ ریکھا گپتا نے جمعہ کو پچھلی سرکاروں کے کام کرنے کے انداز پر سخت تنقید کی۔ انہوں نے کہا کہ موجودہ سرکار وعدوں اور اعلانات کی نہیں نتائج کی سرکار ہے ۔ انہوں نے کہا کہ چاہے وہ 15 سالہ کانگریس کی سرکار ہو یا 11 سالہ عام آدمی پارٹی کی سرکار، تشہیر اور پوسٹر کی سیاست پر زور دیا گیا۔ تاہم، ان کی سرکار’ کاغذکم، زیادہ کام‘ کے اصول پر انتظامی نظام چلا رہی ہے۔
وزیر اعلیٰ نے کہا کہ پچھلی سرکاروںں کے دوران دہلی میں شور زیادہ اور حل کم تھے۔ الزام تراشی، تاخیر اور محاذ آرائی کی سیاست نے انتظامی ترقی کی راہ میں رکاوٹ ڈالی۔ اس کے برعکس موجودہ سرکار نے ٹائم لائن پر مبنی طریقہ اپنایا ہے اور احتساب کو ترجیح دی ہے۔ انہوں نے واضح طور پر کہا کہ دہلی اب ز مینی نتائج دیکھ رہا ہے، ٹویٹس اور اشتہارات کی سیاست نہیں۔ جمنا کی صفائی کے معاملے پر وزیر اعلیٰ نے کہا کہ کئی دہائیوں سے صرف اعلانات کیے گئے، لیکن کوئی حقیقی بہتری نہیں آئی۔
انہوں نے الزام لگایا کہ 15 سالہ کانگریس اور 11 سالہ آپ کی سرکاریں جمنا کی بحالی کو سنجیدگی سے لینے میں ناکام رہیں، جس کے نتیجے میں دریا کی حالت بدتر ہوتی گئی۔ عہدہ سنبھالنے کے بعد، موجودہ حکومت نے سیوریج ٹریٹمنٹ پلانٹس کو اپ گریڈ کرنے، نالوں کی ٹیپنگ اور نئے منصوبوں پر کام شروع کیا، جس کی وجہ سے آلودگی پر قابو پانے میں ٹھوس پیش رفت ہوئی ہے۔
انہوںنے کچرے کے انتظام کو لے کر پچھلی سرکاروں کو تنقید کا نشانہ بنایا۔ انہوں نے کہا کہ روزانہ کچر ے کی پیداوار کے مطابق پروسیسنگ کی صلاحیت میں اضافہ نہیں کیا گیا جس کی وجہ سے کوڑا کر کٹ جمع ہوتا ہے۔ اب، بائیو مائننگ کی صلاحیت میں کئی گنا اضافہ کر دیا گیا ہے، اور ایک ہدف مقرر کیا گیا ہے کہ تمام یومیہ فضلہ کو ایک ہی دن پراسیس کیا جائے۔ آلودگی پر قابو پانے کے حوالے سے وزیراعلیٰ نے کہا کہ سابقہ سرکاروں نے صرف نعرے لگائے اور پریس کانفرنسیں کیں جبکہ موجودہ سرکار نے سائنسی تحقیق کی بنیاد پر قلیل مدتی، وسط مدتی اور لانگ ٹرم روڈ میپ تیار کیا ہے اور اس پر عملدرآمد شروع کر دیا ہے۔
تعلیم کے شعبے میں وزیر اعلیٰ نے کہا کہ پچھلی سرکاروں نے حد سے زیادہ ترقی دی جبکہ ڈھانچہ جاتی اصلا حات بہت کم تھیں۔ ان کی سرکارکے برسراقتدار آنے کے بعد، فیس ریگولیشن ایکٹ نافذ کیا گیا، جس سے نجی اسکولوں کی من مانی پر قابو پایا گیا، جو پہلے ناممکن تھا۔ یہ فیصلہ لاکھوں والدین کے لیے ریلیف ثابت ہوا ہے۔ انتظامی ورک کلچر پر تبصرہ کرتے ہوئے انہوں نے کہا کہ جب تصادم کی سیاست کو ترجیح دی جاتی تھی اب بات چیت اور ہم آہنگی کو اپنایا گیا ہے۔ پچھلی حکومتوں کے دوران گورننس میں شفا فیت اور جوابدہی کا فقدان تھا لیکن اب ڈیجیٹل نظام، مالیاتی نظم و ضبط اور ادارہ جاتی اصلاحات کے ذریعے نظام کو مضبوط کیا گیا ہے۔
وزیر اعلیٰ ریکھا گپتا نے کہا کہ پچھلی سرکاریںاقتدار کو لطف اندوزی کا ذریعہ سمجھتی تھیں جبکہ موجودہ سرکار اسے خدمت کا ذریعہ سمجھتی ہے۔ عام آدمی پارٹی کے رہنما اور دہلی کے سابق وزیر اعلی اروند کجریوال پر تنقید کرتے ہوئے انہوں نے کہا کہ جہاں بھی انہیں سیاسی فائدہ نظر آتا ہے، وہ فوری طور پر امدادی فنڈز کے لیے چیک لے کر پہنچ جاتے ہیں، لیکن کووڈ کے دوران مرنے والے سرکاری ملازمین اور ڈاکٹروں کے اہل خانہ کو زیر التواءامداد فراہم نہیں کی گئی۔ موجودہ سرکارنے ایسے تمام معاملات کو حل کیا۔ انہوں نے یقین ظاہر کیا کہ ایک سال میں سمت کی تبدیلی شروع ہو گئی ہے اور آنے والے سالوں میں راجدھانی کی حالت میں نمایاں تبدیلی دیکھنے کو ملے گی۔