ہندوستانی خاتون شہزادی کاابوظہبی میں پھانسی

شہزادی کے والد نے یکم مارچ کو دہلی ہائی کورٹ میں درخواست دائر کی تھی، جس میں وزارت خارجہ سے ان کی بیٹی کی قانونی حیثیت اور موجودہ حالت کے بارے میں وضاحت طلب کی گئی تھی لیکن جب عدالت میں وزارت خارجہ کا جواب داخل ہوا، تو یہ انکشاف ہوا کہ شہزادی کو پہلے ہی 15 فروری کو پھانسی دی جا چکی ہے۔

اب خاندان پر غموں کا پہاڑ ٹوٹ پڑا ہے۔ انہیں حال ہی میں یہ اطلاع دی گئی ہے کہ شہزادی کی آخری رسومات کے لیے 5 مارچ کی تاریخ مقرر کی گئی ہے۔

شہزادی خان دسمبر 2021 میں ویزے پر متحدہ عرب امارات گئی تھیں اور اگست 2022 میں ایک خاندان کے یہاں چائلڈ کیئر ورکر کے طور پر کام کرنے لگیں۔ دسمبر 2022 میں بچے کو ایک ٹیکہ لگایا گیا، جس کے بعد اسی دن اس کی موت ہو گئی۔ والدین نے پوسٹ مارٹم کرانے سے انکار کر دیا اور پولیس کی ابتدائی تحقیقات کو بھی روکنے کے لیے ایک رضامندی نامے پر دستخط کر دیے۔ تاہم، فروری 2023 میں شہزادی کی ایک ویڈیو سامنے آئی، جس میں وہ مبینہ طور پر قتل کا اعتراف کر رہی تھیں۔ ان کے والدین کا الزام ہے کہ یہ بیان دباؤ اور تشدد کے ذریعے لیا گیا۔