مدھیہ پردیش میں گوشت کی دکانوں کے خلاف بلڈوزر کاروائی

بھوپال:مدھیہ پردیش میں کھلے میں گوشت فروخت کرنے والوں کے خلاف کارروائی کا حکم صادرہونے کے بعداجین میونسپل کارپوریشن نے جمعہ کے روز گوشت کی کئی دکانوں کو بلڈوزر سے منہدم کر دیا۔قابل ذکر ہے کہ جمعرات کو بھی شہر میں کچھ گوشت کی دکانوں کے خلاف کارروائی ہوئی تھی۔ میونسپل کارپوریشن کے ایڈیشنل کمشنر رادھے شیام منڈلوئی کا کہنا ہے کہ حکومت کی ہدایت پر ہی شہر کے ناگ جھری علاقہ میں بغیر اجازت چل رہی گوشت کی دکانوں پر کارروائی کی گئی ہے۔سرکاری افسر کے مطابق کھلے میں گوشت فروخت کرنے والی تقریباً 10 دکانوں کے خلاف کارروائی کی گئی ہے اور سڑک کنارے واقع کچھ دکانوں کو بھی میونسپل کارپوریشن نے منہدم کر دیا ہے۔ کارپوریشن نے موقع پر سے کچھ سامان بھی ضبط کیے ہیں۔ اس درمیان افسران کی ایک ٹیم نے شہر کے توپ خانہ علاقہ اور مہاکالیشور مندر کے پاس بیگم باغ علاقہ میں گوشت کی دکانوں کے دکانداروں کو تنبیہ کی ہے۔
اس معاملے میں سٹی پولیس سپرنٹنڈنٹ (سی ایس پی) اوم پرکاش مشرا نے بتایا کہ مدھیہ پردیش حکومت نے کھلے میں گوشت کی دکانیں نہ چلانے کا حکم جاری کیا ہے۔ اس کے لیے شیشے یا کوئی شفاف شیٹ کا استعمال ہونا چاہیے۔ علاوہ ازیں گوشت کی دکانیں مذہبی مقامات سے 100 میٹر کی حد کے اندر نہیں ہونی چاہیئں۔ اس حکم کو پیش نظر رکھتے ہوئے میونسپل کارپوریشن، پولیس ٹیم اور ضلع انتظامیہ کی مشترکہ ٹیم عوام کے درمیان بیداری پھیلا رہی ہے۔ دکانداروں کو بھی اصولوں کے تئیں محتاط کیا جا رہا ہے۔ اوم پرکاش مشرا نے بتایا کہ جو بھی اصولوں پر عمل نہیں کرے گا، اس کے خلاف قانون کے مطابق کارروائی کی جائے گی۔