اوکھلا کے کالندی کنج کے نزدیک شاہین باغ 40فٹہ روڈ پر پلیا کے کام کا کیا گیا افتتاح

نئی دہلی، 30 دسمبر(میرا وطن )
آپ کے مقامی ایم ایل اے امانت اللہ خان نے اوکھلا اسمبلی کے ابو الفضل انکلیو وارڈ کے تحت کالندی کنج روڈ پر کافی دنوں سے ٹوٹی پڑی پلیا کے از سر نو تعمیری کام کا افتتاح کیا ۔انہوں نے کہا کہ اس پلیا کو تقریباً ایک کروڑ کی لاگت سے25سے26فٹ چوڑا بنایا جائے گا ۔اس کے ساتھ ہی پلیا کے ارد گرد کے دو سو سے تین سو میٹر کا روڈ بھی بنایا جائے گا ۔اس نو تعمیر شدہ پلیا کے درمیان ڈوائڈر بھی بنایا جائے گا تاکہ لوگوں کو آمدرفت میں کسی بھی طرح کی دقت کا سامنا نہیں کرنا پڑے ۔ واضح رہے کہ یہ پلیا کالند ی کنج روڈ کو 40فٹہ روڈ سے جوڑتی ہے اور شاہین باغ جانے کے لئے واحد بڑی سڑک ہے ۔
اس موقع پرایم ایل اے امانت اللہ خان نے کہا کہ اس پلیا کے ٹوٹ جانے کی وجہ سے کافی دنوں سے علا قائی لوگ پریشان ہورہے تھے ۔اسی کو دیکھتے ہوئے آج پلیا کو از سر نو تعمیرکرنے کا کام کا افتتاح کر د یا گیا ہے ۔انہوں نے کہا کہ اس پلیا کو پلر اور بیم کے ساتھ بنایا جا رہا ہے ۔انہوں نے کہا کہ پلیا کا کام وقت رہتے مکمل کرنے کی ہدایت دی گئی ہے تاکہ لوگوں کو جلد سے جلد راحت مل سکے ۔اس کے ساتھ ہی تعمیری کام میں معیار کا بھی پورا خیال رکھنے کا حکم دیا گیا ہے ۔افتتاحی موقع پرعام آدمی پارٹی کے ابو الفضل انکلیو وارڈ صدرایڈووکیٹ حسن اقبال ،اوکھلا ودھان سبھا نائب صدر عبد الغفار خان ،حافظ مطلو ب ، تنویر عالم،عمران چودھری اور نسیم سلمانی سمیت پارٹی کارکنان موجود تھے۔