ملک میں 2.8 ملین سے زیادہ گھروں میں شمسی توانائی کے کنکشن

نئی دہلی،5فروری (میرا وطن)
گزشتہ دو سالوں میں ملک میں 2.8 ملین سے زیادہ گھروں میں شمسی توانائی کے کنکشن لگائے گئے ہیں ، اور مرکزی سرکارنے اس مقصد کے لیے 16,061 کروڑ روپے سے زیادہ کی سبسڈی فراہم کی ہے ۔ یہ رقم پردھان منتری سوریہ گھر مفت بجلی یوجنا (پی ایم جی ایس وائی) کے تحت فراہم کی گئی تھی۔مرکز ی سرکار نے یہ معلومات جنوبی دہلی کے رکن پارلیمنٹ رام ویر سنگھ بدھوڑی کے سوال کے جواب میں فراہم کی۔
بدھوڑی نے نئی اور قابل تجدید توانائی کی وزارت سے پردھان منتری سوریہ گھر مفت بجلی یوجنا کے تحت شمسی توانائی کے کنکشن کے بارے میں معلومات مانگی تھی۔ اس کے جواب میں مرکزی وزیر مملکت پد یسو نائک نے لوک سبھا میں تحریری جواب داخل کیا۔ اس میں کہا گیا ہے کہ پی ایم جی ایس وائی فروری 2024 میں شروع کیا گیا تھا۔ اس کے بعد سے، 30 جنوری 2026 تک، 16,061.12 کروڑ روپے مرکزی مالی امداد کے طور پر تقسیم کیے جا چکے ہیں۔ اس کے نتیجے میں کل 28,24,518 گھرا نوں کو شمسی توانائی کے کنکشن مل چکے ہیں۔
بدھوڑی نے یہ بھی پوچھا کہ سرکار اس اسکیم کو وسعت دینے کے لیے کیا اقدامات کر رہی ہے۔ اس کے جواب میں سرکارنے لوک سبھا کو بتایا کہ رہائشی صارفین اس اسکیم کے لیے ایک قومی پورٹل کے ذریعے اندراج کر سکتے ہیں، اور سبسڈی براہ راست ان کے بینک کھاتوں میں جمع کر دی جاتی ہے۔ پورا نظام اب آن لائن ہے، اور 5.75 فیصد کی شرح سے قرضے کے ساتھ 10 کلو واٹ تک کا لوڈ لیا جا سکتا ہے ۔ شمسی توانائی کے کنکشن فراہم کرنے والے دکانداروں کی رجسٹریشن کو بھی آسان بنایا گیا ہے، جس سے رہائشیوں کی آسانی کو یقینی بنایا گیا ہے۔