سیف علی خان پر حملے کے معاملے میں مشتبہ شخص گرفتار

ممبئی: بالی ووڈ اداکار سیف علی خان پر حملے کے معاملے میں پولیس نے ایک مشتبہ شخص کو حراست میں لے لیا ہے۔ میڈیا میں شائع رپورٹوں کے مطابق، یہ مشتبہ شخص دیکھنے میں بالکل ویسا ہی ہے جیسا کہ سی سی ٹی وی فوٹیج میں نظر آیا تھا۔ پولیس نے اسے حراست میں لے کر تفتیش شروع کر دی ہے۔
ڈی سی پی ممبئی کے مطابق، گرفتار مشتبہ شخص ہاؤس بریکنگ کے کئی مقدمات میں مطلوب ہے۔ پولیس اسے پہلے بھی گرفتار کر چکی ہے اور اس سے مزید تفصیلات حاصل کرنے کی کوشش کی جا رہی ہیں۔یہ واقعہ 16 جنوری کی رات ممبئی کے باندرہ میں سیف علی خان کے اپارٹمنٹ میں پیش آیا۔ حملہ آور، جو مبینہ طور پر چوری کی نیت سے داخل ہوا تھا، نے بچوں کے کمرے میں داخل ہو کر سیف پر چھری سے وار کیے۔
مزاحمت کے دوران سیف زخمی ہوئے اور انہیں فوری طور پر لیلاوتی اسپتال لے جایا گیا جہاں ان کی سرجری کی گئی۔ ڈاکٹروں نے ان کی ریڑھ کی ہڈی سے 2.5 انچ کا دھار دار ٹکڑا نکالا۔ خوش قسمتی سے اب وہ خطرے سے باہر ہیں اور طبی نگرانی میں ہیں۔
پولیس نے حملہ آور کو پکڑنے کے لیے 20 ٹیمیں تشکیل دیں، جنہیں مختلف علاقوں میں چھاپے مارنے کا کام دیا گیا۔ سی سی ٹی وی فوٹیج اور دیگر شواہد کی بنیاد پر تحقیقات کی جا رہی ہیں۔ حکام کو شبہ ہے کہ حملہ آور نے فرار ہونے سے پہلے اپنے کپڑے تبدیل کیے تھے۔
اس واقعے میں گھر پر موجود 56 سالہ نرس الیامہ فلپ بھی زخمی ہوئی، جس کے بیانات اور دیگر اسٹاف کے بیانات قلم بند کیے گئے ہیں۔ نرس نے پولیس کو بتایا کہ رات کے اڑھائی بجے کے قریب نینی (بچوں کی دیکھ بھال کرنے والی) نے کچھ آوازیں سنیں، جس پر سیف جاگ گئے اور حملہ آور کا سامنا کیا۔ حملہ آور کئی وار کرنے کے بعد فرار ہو گیا۔ پولیس یہ جاننے کی کوشش کر رہی ہے کہ مشتبہ شخص گھر کے اندر پہلے سے موجود تھا یا باہر سے آیا تھا۔