ڈاکٹر منظور عالم کے انتقال پرجمعیت علماءہند کا اظہار تعزیت

نئی دہلی ،31جنوری (میرا وطن)
جمعیت علماءہند کے صدر مولانا محمود اسعد مدنی اور جنرل سکریٹری مولانا محمد حکیم الدین قاسمی نے معرو ف اسکالر اور آل ا نڈیا ملی کونسل کے جنرل سکریٹری ڈاکٹر منظور عالم کے انتقال پر گہرے رنج والم کا اظہار کیا ہے۔
ڈاکٹر منظور عالم نے اپنی حیات مستعار کو علم، تحقیق اور ادارہ سازی کے لیے وقف کر رکھا تھا۔ انہوں نے اسلامی معاشیات کی ترویج و اشاعت میں نمایاں کردار ادا کیا۔ وہ انسٹی ٹیوٹ آف آبجیکٹو اسٹڈیز (آئی او ایس) کے بانی تھے، جس کے ذریعے انہوں نے فکری رہنمائی فراہم کی اور سیکڑوں معیاری تحقیقی کتب و مجلات شائع کیے۔ اسی پلیٹ فارم کے ذریعے متعدد نوجوان قلم کاروں اور محققین کو اپنی صلاحیتیں نکھارنے اور آگے بڑھنے کا موقع ملا۔ اس کے علاوہ آل انڈیا ملی کونسل کے پلیٹ فارم سے بھی ان کی سرگرمیاں قابلِ قدر ہیں۔
جمعیت علماءہند کی طرف سے ان کے اہلِ خانہ اور تمام وابستگان سے دلی تعزیت کا اظہار ہے۔ اللہ تعا لیٰ مرحوم کی علمی و ملی خدمات کو شرفِ قبولیت بخشے اور در گزر کرکے جنت الفردوس میںجگہ عطا فرمائے اور پسماندگان کو صبرِ جمیل عطا فرمائے