اسرو بیک وقت 7 سیٹلائٹوں کو خلا میں بھیجنے میں کامیاب

شری ہری کوٹا:انڈین اسپیس ریسرچ آرگنائزیشن یعنی اسرو نے آج صبح بیک وقت 7 سیٹلائٹوں کو کامیابی کے ساتھ خلا میں روانہ کر کے ایک اور تاریخ رقم کر دی۔ ان میںایک ہندوستانی اور 6 سنگاپور کے سیٹلائٹ شامل ہیں۔ ان سیٹلائٹوں کو پی ایس ایل وی-سی56 راکٹ کے ذریعے آندھرا پردیش کے شری ہری کوٹا سے خلا میں روانہ کیا گیا۔
اسرو کا یہ مکمل طور پر تجارتی مشن ہے، جسے نیو اسپیس انڈیا لمیٹڈ چلا رہا ہے۔ اس کے لیے ہفتہ کو الٹی گنتی شروع ہوگئی تھی۔ اسرو نے بتایا کہ 360 کلوگرام ڈی ایس –سار سیٹلائٹ کو سنگاپور حکومت کی نمائندہ ایجنسی ڈی ایس ٹی اے اور سنگاپور کی کمپنی ایس ٹی انجینئرنگ کے ساتھ مل کر تیار کیا گیا ہے۔
پی ایس ایل وی-سی56 راکٹ نے سنگاپور کے ارتھ آبزرویشن سیٹلائٹ ڈی ایس-ایس اے آر اور 6 دیگر سیٹلائٹس کو اتوار کی صبح 6.30 بجے روانہ کیا۔ اس مہینے دیرینہ چندریان-3 لانچ کرنے کے بعد اب پی ایس ایل وی-سی56 لانچ ایک مہینے کے اندر اسرو کی ایک اور بڑی کامیابی ہے۔ اس سے قبل 14 جولائی کو اسرو نے ایل وی ایم-3 لانچ وہیکل کو سری ہری کوٹا میں ستیش دھون خلائی مرکز سے مدار میں کامیابی کے ساتھ چھوڑا تھا۔
اس سال ہندوستانی خلائی ایجنسی کا یہ تیسرا تجارتی مشن ہے۔ اسرو نے اس سے قبل مارچ میں ایل وی ایم-3 راکٹ کے ساتھ برطانیہ کے ون-ویو سے وابستہ 36 سیٹلائٹوں کو لانچ کیا تھا۔ اس کے بعد اپریل میں پی ایس ایل وی راکٹ سے سنگاپور کے 2 سیٹلائٹ لانچ کیے گئے۔ ڈی ایس-ایس اے آر کو سنگاپور کی دفاعی سائنس اور ٹیکنالوجی ایجنسی اور سنگاپور کی ایس ٹی انجینئرنگ کے درمیان شراکت داری کے تحت تیار کیا گیا ہے۔
لانچ کے بعد اس سیٹلائٹ کو حکومت سنگاپور کی مختلف ایجنسیوں کی سیٹلائٹ امیجنگ کی ضروریات کے لیے استعمال کیا جائے گا۔ ڈی ایس-ایس اے آر اسرائیل ایرو اسپیس انڈسٹریز سے تیار کردہ مصنوعی اپرچر ریڈار (ایس اے آر) سے لیس ہے۔ یہ سیٹلائٹ کو تمام موسمی حالات میں دن اور رات کی تصاویر لینے کے قابل بنائے گا۔