امریکی انتخا ب میں الہان عمرکے ہاتھوں اسرائیل حامی امیدوار کی شکست

واشنگٹن: امریکی کانگریس کی خاتون رکن الہان عمر نے انتخابات 2024 کے دوران اپنے حریف و اسرائیل کی حامی ریپبلکن امیدوار کو باآسانی شکست دیدی۔ مڈل ایسٹ آئی کی رپورٹ کے مطابق صومالی نژاد مسلم خاتون ایسے وقت میں سامنے آئی ہیں جب اسرائیل کے حامی گروپوں کی جانب سے گزشتہ اگست کے پرائمری انتخابات میں انہیں ہٹانے کی کوشش کی گئی تھی۔ مینیسوٹا کے پانچویں ضلع کی نمائندگی کرنے والی الہان کے مدمقابل ریپبلکن امیدوار دالیہ العقیدی تھیں جو ایک عراقی نژاد تارک وطن ہیں جو خود کو سیکولر مسلمان کہتی ہیں اور اسرائیل کی حامی ہیں، جبکہ ان کے برعکس الہان عمر فلسطینیوں کے حقوق کیلئے آواز اٹھانے والی شخصیت ہیں۔87فیصد ووٹوں کی گنتی کے مطابق الہان عمر نے دالیہ العقیدی کے 23.6 فیصد کے مقابلے میں 76.4 فیصد ووٹ حاصل کیے۔
میڈیا رپورٹ کے مطابق الہان عمر نے چوتھی بار رکن کانگریس بننے کا اعزاز حاصل کیا ہے ۔دوسری جانب ڈیموکریٹک امیدوار راشدہ طلیب بھی مشی گن کی نشست پر کامیاب ہوگئیں، راشدہ طلیب بھی غزہ اسرائیل کی جارحیت کے خلاف کئی مرتبہ آواز اٹھا چکی ہیں۔یاد رہے کہ گزشتہ برس امریکہ کے ایوان نمائندگان میں ری پبلکنز نے برتری حاصل کرنے کے بعد ڈیموکریٹک رکن الہان عمر کو دو سال پہلے دیے گئے اسرائیل مخالف بیان پر خارجہ امور کمیٹی سے باہر کردیا تھا۔امریکی ایوان نمائندگان میں اکثریت رکھنے والے ری پبلکن اراکین نے الہان عمر کو ہٹانے کی وجہ 2019 میں دیے گئے ان کا بیان قرار دیا تھا حالانکہ انہوں نے اپنے بیان پر معذرت بھی کرلی تھی۔صومالی نژاد الہان عمر امریکی ایوان نمائندگان میں واحد افریقی نژاد اور چند مسلمان خواتین میں سے ایک تھیں اور وہ خارجہ امور کے پینل کی ذیلی کمیٹی برائے افریقہ میں ڈیموکریٹک نمائندگی کر رہی تھیں۔واضح رہے کہ امریکہ میں 47ویں صدر کے انتخاب متعدد ریاستوں میں پولنگ اختتام کو پہنچ گئی ہے تاہم سوئنگ ریاستوں جارجیا اور پنسلوینیا میں پولنگ کا وقت بڑھا دیا گیا، متعدد ریاستوں میں ڈونالڈ ٹرمپ اور کاملا ہیریس کے درمیان سخت مقابلہ جاری ہے ۔صدارتی انتخاب میں جیت کیلئے 538 میں سے کم از کم 270 الیکٹورل ووٹ درکار ہیں جبکہ 7 پانسہ پلٹ ریاستیں ایریزونا، جیورجیا، مشی گن، نیواڈا، شمالی کیرولائنا، پینسلوینیا اور اور وسکونس جیت کی راہ میں اہم کردار ادا کریں گی۔امریکی نشریاتی ادارے ‘وائس آف امریکہ’ کے مطابق ڈونالڈ ٹرمپ نے اب تک 246 الیکٹورل ووٹ حاصل کرلیے جبکہ کاملا ہیریس 214 الیکٹورل ووٹ حاصل کرنے میں کامیاب رہی ہیں۔