وزیر اعظم نریندر مودی نے دوبارہ تیار شدہ آئی ٹی پی او کمپلیکس میں ہون پوجن کیا

نئی دہلی: وزیر اعظم نریندر مودی آج  پرگتی میدان پہنچے۔ انہوں نے یہاں دوبارہ تیار شدہ آئی ٹی پی او کمپلیکس کے احاطے میں ہون پوجن کیا۔ وزیر اعظم نے آئی ٹی پی او کمپلیکس بنانے والے ملازمین سے ملاقات کی اور شال اوڑھا کر ان کی عزت افزائی کی۔ اس کے بعد وزیر اعظم نے ملازمین کے ساتھ گروپ فوٹو شوٹ کرایا۔ انڈین ٹریڈ پروموشن آرگنائزیشن (آئی ٹی پی او) کمپلیکس کا باضابطہ افتتاح آج شام کیا گیا، جہاں جی 20 لیڈروں کا اجلاس ستمبر میں منعقد ہوگا۔ آئی ٹی پی او کیمپس کو پرگتی میدان کیمپس کے نام سے بھی جانا جاتا ہے۔

تقریباً 123 ایکڑ کے رقبے پر پھیلا یہ کمپلیکس میٹنگوں، کانفرنسوں اور نمائشوں کے انعقاد کے لئے ہندوستان کا سب سے بڑا مقام ہے۔ ذرائع کے مطابق جہاں تک ایونٹس کے لئے دستیاب انڈور جگہ کا سوال ہے تو آئی ٹی پی او کمپلیکس کا دوبارہ تیار کردہ اور جدید IECC (بین الاقوامی نمائش کم کنونشن سینٹر) کمپلیکس دنیا کے ٹاپ 10 نمائشی اور کنونشن کمپلیکس میں سے ایک ہے۔کنونشن سینٹر کے لیول 3 میں 7,000 لوگوں کے بیٹھنے کی گنجائش ہے، جو اسے آسٹریلیا کے تاریخی سڈنی اوپیرا ہاؤس سے بڑا بناتا ہے، جس میں تقریباً 5500 افراد کے بیٹھنے کی گنجائش ہے ۔ حکام کے مطابق یہ خصوصیت آئی ای سی سی کو عالمی سطح پر بڑی کانفرنسوں، بین الاقوامی سربراہی اجلاسوں اور ثقافتی تقریبات کے انعقاد کے لئے موزوں مقام بناتی ہے۔

انہوں نے بتایا کہ نمائشی ہالز میں مصنوعات، اختراعات اور نئے آئیڈیاز کی نمائش کے لئے سات جدید مقامات ہیں۔ اس کے ساتھ ہی آئی ای سی سی کے پاس ایک بڑا ایمفی تھیٹر ہے، جس میں 3000 لوگوں کے بیٹھنے کی گنجائش ہے۔