نیوز کلک کے بانی ایڈیٹر پربیر پورکایستھ کی عدالتی تحویل میں2 نومبر تک توسیع

نئی دہلی: دہلی کی ایک عدالت نے بدھ کے روز نیوز کلک کے بانی ایڈیٹر پربیر پورکایستھ اور انسانی وسائل کے سربراہ امیت چکرورتی کی عدالتی تحویل میں آٹھ دن کی توسیع کر دی، جنہیں غیر قانونی سرگرمیاں (روک تھام) ایکٹ کے تحت درج ایک کیس میں گرفتار کیا گیا ہے۔
دونوں کو بدھ کو ایڈیشنل سیشن جج (اے ایس جے) ہردیپ کور کے سامنے پیش کیا گیا۔
عدالت نے ان کی عدالتی تحویل میں 2 نومبر تک توسیع کر دی۔پورکایستھ اور چکرورتی کو دہلی پولس کے اسپیشل سیل نے 3 اکتوبر کو گرفتار کیا تھا۔ ان کی گرفتاری کے ایک دن بعد، پٹیالہ ہاؤس کورٹ کے ایڈیشنل سیشن جج (اے ایس جے) ہردیپ کور نے انہیں 4 اکتوبر کو سات دن کی پولیس حراست میں بھیج دیا تھا۔ اس کے بعد دونوں نے ہائی کورٹ سے رجوع کیا لیکن کوئی راحت نہیں ملی۔
اس کے بعد دونوں سپریم کورٹ پہنچے۔ 19 اکتوبر کو سپریم کورٹ نے درخواستوں پر دہلی پولیس کو نوٹس جاری کیا۔ سپریم کورٹ اب اس معاملے کی سماعت 30 اکتوبر کو کرے گی۔ پورکایستھ کی نمائندگی کرتے ہوئے سینئر وکیل کے سبل نے ہائی کورٹ کے سامنے دلیل دی تھی کہ تمام حقائق غلط ہیں اور چین سے ایک پیسہ بھی نہیں آیا۔3 اکتوبر کو اسپیشل سیل کی طرف سے کی گئی تلاشی، ضبطی اور حراست کے حوالے سے ایک بیان میں، دہلی پولیس نے کہا تھا کہ دفتر کے احاطے میں کل 37 مرد اور نو خواتین مشتبہ افراد سے پوچھ گچھ کی گئی۔ ملزمان سے ان کی رہائش گاہوں پر پوچھ گچھ کی گئی۔پولیس نے کہا کہ ڈیجیٹل آلات، دستاویزات ضبط کر لیے گئے ہیں۔ اسپیشل سیل نے 17 اگست کو نیوز کلک کے خلاف یو اے پی اے اور تعزیرات ہند کی مختلف دفعات کے تحت کیس کے سلسلے میں ایف آئی آر درج کی تھی۔