مکہ مکرمہ میں منعقدہ عالمی مسابقہ حفظِ قرآن کریم میں ابراہیم بن فہیم شاہ بندری کو دوسرا مقام

بھٹکل: سعودی حکومت کی جانب سے مکہ مکرمہ میں منعقدہ تینتالیسویں عالمی مسابقہ حفظِ قرآن کریم میں کرناٹک کے بھٹکل سے تعلق رکھنے والے ابراہیم بن فہیم شاہ بندری نے دوسرا مقام حاصل کیا ہے جس پر انہیں 60 ہزار سعودی ریال (تیرہ لاکھ تیس ہزار روپئے) بطورِ انعام دیئے گئے ہیں۔
واضح رہے کہ 25 اگست سے شروع ہونے والے اس عالمی مسابقہ کے پانچ زمروں میں 117 ممالک سے 166 مساہمین نے حصہ لیا۔ 6 ستمبر کو اس عالمی مسابقہ کی اختتامی نشست مسجد حرام میں منعقد کی گئی جس میں ہر زمرہ میں پہلا، دوسرا، تیسرا، چوتھا اور پانچواں مقام حاصل کرنے والوں کو انعامات سے نوازا گیا۔اہلیانِ بھٹکل کے لیے یہ بڑے اعزاز کی بات ہے کہ ابراہیم ابن فہیم شاہ بندری نے پانچ پاروں کے حفظ مقابلہ میں حصہ لیتے ہوئے ہندوستان کی نمائندگی کی اور اپنے زمرہ میں دوسرا مقام حاصل کرکے بھٹکل سمیت پورے ملک کا نام روشن کیا ہے ۔
واضح رہے کہ سعودی حکومت کی جانب سے اس عالمی مسابقہ کے ممتاز طلبہ کے لیے آٹھ کروڑ اسی لاکھ روپیے کے انعامات تقسیم کیے گئے۔(بہ شکریہ فکروخبر)