دہلی ،پنجاب، ہریانہ اور راجستھان میں سر د لہر برقرار

نئی دہلی : دہلی ،پنجاب، ہریانہ اور راجستھان میں سردی کی لہر برقرار ہے۔ یہ سلسلہ مزید دو روز تک جاری رہنے کی توقع ہے۔ اس دوران 14 ریاستوں میں دھند کی وجہ سے عام زندگی متاثر ہوگئی ہے۔ ٹرینوں کی رفتار بھی کم تھی جس کی وجہ سے وہ گھنٹوں تاخیر سے اپنی منزل پر پہنچیں۔ شمالی ہندوستان کے بیشتر علاقوں میں کم سے کم درجہ حرارت میں کمی ریکارڈ کی گئی ہے۔ مغربی ڈسٹربنس کی وجہ سے، 8سے10 جنوری کے درمیان شمال مغربی اور وسطی ہندوستان میں بارش اور گرج چمک کے ساتھ بارش کا امکان ہے۔
ہندوستان کے محکمہ موسمیات (آئی ایم ڈی) نے کہا کہ دہلی، پنجاب اور ہریانہ میں پیر کو بھی شدید سے شدید سردی برقرار رہ سکتی ہے۔ اس کے بعد درجہ حرارت قدرے بڑھے گا اور سردی سے راحت ملے گی۔ محکمہ موسمیات کے مطابق 14 ریاستوں میں دھند کی کیفیت برقرار ہے۔ ان میں دہلی، اتر پردیش، مدھیہ پردیش، پنجاب، ہریانہ، راجستھان، ہماچل پردیش، اتراکھنڈ، بہار، جھارکھنڈ، اوڈیشہ شامل ہیں۔ اس کے علاوہ شمال مشرق میں آسام، میگھالیہ، میزورم اور تریپورہ میں بھی گھنے دھند کی پیش گوئی کی گئی ہے۔