عام آدمی پارٹی نے بی جے پی سے سی ایم امیدوار کا نام پوچھا

دہلی اسمبلی انتخابات کی تاریخوں کے اعلان کے ساتھ ہی سیاسی جماعتوں کے درمیان بیان بازی اور پوسٹر وار شدت اختیار کر گئی ہے۔ عام آدمی پارٹی (عآپ) نے دہلی کی سڑکوں پر کئی مقامات پر بڑے ہورڈنگز لگوائے ہیں، جن میں بھارتیہ جنتا پارٹی (بی جے پی) کو ہدف تنقید بناتے ہوئے اسے ’گالی گلوج پارٹی‘ قرار دیا گیا ہے۔

ان پوسٹرز میں سوال کیا گیا ہے کہ دہلی کا وزیر اعلیٰ کون ہوگا؟ ایک طرف وزیر اعلیٰ اروند کیجریوال کی تصویر ہے جبکہ دوسری طرف سوالیہ نشان کے ساتھ گالی گلوج پارٹی لکھا ہوا ہے۔ یہ ہورڈنگز خاص طور پر وزیر آباد فیز 1 اور شادی پور ڈپو کے علاقے میں لگائے گئے ہیں۔

اس کے ساتھ ہی، عام آدمی پارٹی نے سوشل میڈیا پر بھی حملہ تیز کر دیا ہے۔ پلیٹ فارم ‘ایکس’ پر جاری کردہ ایک ویڈیو میں بی جے پی سے پوچھا گیا کہ “بغیر دلہا کا گھوڑا کس کا ہے؟” ویڈیو کے عنوان میں طنز کرتے ہوئے لکھا گیا، “بھاجپا والو، تمہارا دلہا کون ہے؟” اس مہم کے ذریعے آپ بی جے پی کی طرف سے وزیر اعلیٰ کے امیدوار کے چہرے کو ظاہر نہ کرنے پر سوال اٹھا رہی ہے۔
بی جے پی نے جوابی وار کرتے ہوئے عام آدمی پارٹی کے خلاف نیا پوسٹر جاری کیا، جس میں کہا گیا، “آپ-دا جائے گی، بھاجپا آئے گی۔” دونوں جماعتوں کے درمیان یہ پوسٹر وار انتخابات کی گرمی کو ظاہر کرتی ہے۔

دہلی اسمبلی کی 70 نشستوں پر انتخابات 5 فروری کو ہوں گے جبکہ نتائج کا اعلان 8 فروری کو کیا جائے گا۔ انتخابی میدان میں بی جے پی اور عام آدمی پارٹی کے درمیان سخت مقابلے کی توقع ہے، جبکہ کانگریس بھی اپنے امیدواروں کے ساتھ میدان میں موجود ہے۔

دلچسپ بات یہ ہے کہ جس انڈیا بلاک کا حصہ عام آدمی پارٹی اور کانگریس ہیں، اس کے دیگر اتحادی جیسے ترنمول کانگریس (ٹی ایم سی) اور سماجوادی پارٹی نے عام آدمی پارٹی کی حمایت کا اعلان کیا ہے۔ یہ اتحاد بی جے پی کے خلاف طاقتور اپوزیشن کے طور پر خود کو پیش کرنے کی کوشش کر رہا ہے۔