ودودرہ شہر میں 21 سالہ مسلم نوجوان کاپیٹ پیٹ کرقتل

احمد آباد : گجرات کے ودودرہ شہر میں ایک 21 سالہ مسلم نوجوان کو چوری کے شبہ میں پیٹ پیٹ کر ہلاک کردیا گیا ۔کہا گیا ہے کہ ودودرہ شہر کے وارثیہ علاقہ میںیہ واقعہ پیش آیا جبکہ متوفی کی شہباز خان سلیم خان پٹھان کی حیثیت سے شناخت ہوئی ہے ۔ اس کا ساتھی 20 سالہ عمران طلائی والا زخمی ہے ۔ ان دونوں کو ہفتہ کی رات دیر گئے مقامی عوام نے روکا اور الزام عائد کیا کہ یہ لوگ چوری کرنے کی کوشش کر رہے تھے ۔ مقامی افراد نے بتایا کہ پوچھ تاچھ پر دونوں فرار ہونے کی کوشش کر رہے تھے ۔ طلائی والا بچ نکلا جبکہ پٹھان کو ہجوم نے پکڑ کر بے تحاشہ مارپیٹ کی ۔ پولیس بھی یہاں پہونچی اور صورتحال پر قابو کرنے کی کوشش کی ۔ دھکم پیل میں تین پولیس ملازمین بھی زخمی ہوئے ۔ پولیس نے دونوں نوجوانوںکو دواخانہ منتقل کیا جہاں پٹھان کو مردہ قرار دیا گیا جبکہ طلائی والا کا علاج جاری ہے ۔