نئی نسل کے ایمان کا تحفظ وقت کا اولین تقاضہ: مولانا محمود اسعد مدنی

نئی دہلی ،29دسمبر (میرا وطن )
دینی تعلیمی بورڈ، جمعیت علماءہند کے زیر اہتمام آئی ٹی او واقع صدر دفتر کے مدنی ہال میں ایک روزہ تعا رفی و تنظیمی اجلاس منعقد ہوا، جس میں مختلف اضلاع کے ذمہ داران، معلمین اور وابستگان مکاتب نے شرکت کی۔ اجلاس میں شرکاءکو اس امر کی طرف توجہ دلائی گئی کہ مکاتب محض تعلیمی ادارے نہیں بلکہ ملت کی فکری، اخلاقی اور روحانی بنیادوں کے محافظ ہیںاور ان کا استحکام درحقیقت قوم کے مستقبل کی ضمانت ہے۔
اپنی صدارتی تقریر میں جمعیت علماءہند کے صدر مولانا محمود اسعد مدنی نے نئی نسل کے ایمان کے تحفظ کو موجودہ دور کی سب سے اہم ذمہ داری قرار دیتے ہوئے کہا کہ پ ±رفتن حالات میں بچوں اور بچیوں کی دینی تعلیم و تربیت ایک عظیم امانت ہے، جس میں کسی بھی قسم کی غفلت ناقابلِ تلافی نقصان کا سبب بن سکتی ہے۔مولانا مدنی نے نیت کی اہمیت پر زور دیتے ہوئے اس کی مسلسل اصلاح کو ضروری قرار دیا اور حضرت حسن بصریٰ کے اس قول کا حوالہ دیا کہ میں نے نیت سے زیادہ پلٹنے والی کوئی چیز نہیں دیکھی ۔انہوں نے واضح کیا کہ نیت کی اصلاح کوئی وقتی عمل نہیں بلکہ ایک دائمی جدوجہد ہے، جس کے لیے مسلسل خود احتسابی اور اللہ تعالیٰ سے رجوع ناگزیر ہے۔
خطاب کے دوران مولانا مدنی نے انفرادی کوشش کے بجائے اجتماعی نظام کے تحت منظم جدوجہد کی اہمیت کو اجاگر کرتے ہوئے فرمایا کہ اجتماعیت ہی وہ ذریعہ ہے جو کام میں تسلسل، حوصلہ اور اثر انگیزی پیدا کرتی ہے۔ انہوں نے اس امر پر بھی زور دیا کہ دینی تعلیمی بورڈ، جمعیت علماءہند کا ایک مرکزی اور ترجیحی شعبہ ہے اور آئندہ برسوں تک مکاتب کے میدان میں محنت جمعیت کی اولین ترجیح رہے گی۔ اس موقع پر ذمہ داران سے اپیل کی گئی کہ وہ اپنے مکتب کو منظم کرتے ہوئے کے ساتھ کم از کم پانچ دیگر مکاتب کوبھی منظم کریں اور اپنے علاقوں کے تمام بچوں کو مکاتب سے وابستہ کرنے کو اپنا نصب العین بنائیں۔
اس موقع پر جمعیت علماءہند کے ناظمِ عمومی مولانا حکیم الدین قاسمی نے اکابرامت کی علمی و عملی خدمات کا تذکرہ کرتے ہوئے مکاتب کے ساتھ درس قرآن اور درسِ حدیث کے منظم نظام پر زور دیا، تاکہ تعلیم و تربیت کا ایک متوازن اور جامع ڈھانچہ قائم ہو سکے۔مولانا محمد یونس نے مکاتب کی محنت کو مزید مضبوط بنانے کے عزم کا اظہار کیا۔اجلاس کی نظامت مولانا شعیب احمد قاسمی، ناظم دینی تعلیمی بورڈ، جمعیت علماءہند نے انجام دی۔ مولانا فیروز آدم نے دینی تعلیمی بورڈ کے نصاب کی ترتیب اور افادیت کو واضح کیا، مولانا محمد فضیل نے اور مولانا محمد ذاکر قاسمی نے اظہار خیال کیا۔ حاجی محمد مبشر نے جمعیت سے وابستگی کے عملی مراحل پر تفصیلی پریزنٹیشن پیش کی۔اجلاس کے آخری مرحلے میں سوال و جواب کی نشست منعقد ہوئی، جس میں شرکاءکے سوالات کے تسلی بخش جوابات دیے گئے۔ اختتام پر مفتی محمد حسن، صدر جمعیت علماءتحصیل لونی نے دعا فرمائی۔