رتن ٹاٹا کے انتقال کے بعد مہاراشٹر میں سرکاری پروگرام منسوخ

ملک کے بڑے کاروباریوں میں سے ایک رتن ٹاٹا کے انتقال سے پورے ملک میں غم کی لہر ہے۔ بدھ (9 اکتوبر) کی دیر رات وہ ممبئی کے بریچ کینڈی اسپتال میں چیک اَپ کے لیے داخل ہوئے تھے جہاں انہوں نے 86 سال کی عمر میں آخری سانس لی۔ جانکاری ملنے پر دیر رات مہاراشٹر کے وزیر اعلیٰ ایکناتھ شندے، نائب وزیر اعلیٰ دیوندر فڑنویس اور کاروباری مکیش امبانی بھی اسپتال پہنچے تھے۔
ذرائع کے مطابق رتن ٹاٹا کا جسد خاکی ان کے کولابہ واقع گھر لے جایا جائے گا۔ اس کے بعد صبح 9.45 بجے انہیں کولابہ سے نریمن پوائنٹ کے این سی پی اے لے جایا جائے گا۔ یہاں رتن ٹاٹا کا جسد خاکی آخری دیدار کے لیے صبح 10 بجے سے شام 4 بجے تک رکھا جائے گا۔ اس کے بعد ورلی میں ان کی آخری رسوم ادا کی جائے گی۔
رتن ٹاٹا کے انتقال سے پورے ملک میں سوگ کا ماحول ہے۔ وزیر اعظم نریندر مودی، راہل گاندھی سمیت بڑے بڑے سیاست دانوں، کاروباریوں اور دیگر شعبہ ہائے زندگی سے تعلق رکھنے والی مشہور شخصیات سے لے کر عام لوگوں تک سبھی نے ان کے انتقال پر گہرے صدمے کا اظہار کرتے ہوئے انہیں خراج عقیدت پیش کیا ہے۔ رتن ٹاٹا کے انتقال کے بعد مہاراشٹر کے سبھی سرکاری پروگرام منسوخ کر دیے گئے ہیں جبکہ جھارکھنڈ میں بھی ایک دن کے سوگ کا اعلان کیا گیا ہے۔