دہلی میں بڑھتی آلودگی سے وزیر ماحولیات گوپال رائے فکرمند

نئی دہلی :دہلی کے وزیر ماحولیات گوپال رائے نے کہا کہ کناٹ پلیس پر اسموگ ٹاور کو بند کرنا سپریم کورٹ اور دہلی حکومت کے احکامات کی خلاف ورزی ہے۔گوپال رائے نے ہفتہ کو کہا کہ دہلی میں بڑھتی ہوئی آلودگی کی سطح کو دیکھتے ہوئے انہوں نے مرکزی وزیر ماحولیات کو ایک خط لکھ کر ان سے این سی آر ریاستوں کے ماحولیات کے وزراء کے ساتھ میٹنگ کرنے کی درخواست کی ہے۔ ڈی پی سی سی چیئرمین اشونی کمار کی ہدایت پر اسموگ ٹاور کو بند کرنا سپریم کورٹ اور دہلی حکومت کے احکامات کی خلاف ورزی ہے۔ موسم سرما کے دوران مقامی سطح پر آلودگی سے نمٹنے میں مدد کے لیے جلد ہی سموگ ٹاور شروع کرنے کی ضرورت ہے۔
یو این آئی کی خبر کے مطابق دہلی کے وزیر ماحولیات نے کہا ہے کہ انہوں نے 3 نومبر کی رات آنند وہار ہاٹ اسپاٹ کا دورہ کیا اور دیکھا کہ بی ایس 3 اور بی ایس4 ڈیزل بسیں ابھی بھی سڑکوں پر چل رہی ہیں اور پڑوسی ریاستوں سے دہلی میں داخل ہو رہی ہیں۔دہلی کے دیگر داخلہ مراکز سے بھی اسی طرح کی اطلاعات موصول ہو رہی ہیں۔ اس کے پیش نظر انہوں نے مرکزی وزیر ماحولیات سے درخواست کی کہ وہ پڑوسی ریاستوں سے دہلی میں بی ایس-6 ضابطوں کی تعمیل نہ کرنے والی گاڑیوں کے داخلے پر مؤثر طریقے سے پابندی لگائیں اور این سی آر میں بھی ایسی گاڑیوں پر پابندی لگائی جائے، اورایسی گاڑیوں کی وجہ سے آلودگی نہ ہو تاکہ فضائی آلودگی پر قابو پایا جا سکے۔ ساتھ ہی انہوں نے اتر پردیش، ہریانہ، راجستھان، پنجاب اور دہلی کے ماحولیات کے وزراء کے ساتھ جلد ایک مشترکہ میٹنگ طلب کرنے بھی زور دیا۔